Ўзбекистондаги мобил алоқа компаниялари орасида ўз ўрнига эга бўлган Ucell компаниясининг бир ажойиб анъанаси бор: ҳар йили Янги йил олдидан журналистларни тўплаб, улар билан очиқ мулоқот ўтказади ва қизиқарли савол-жавоблар орқали ўз ишини таҳлил қилади. Бу суҳбатларда нафақат компаниянинг режалари хусусида сўз боради, балки муҳокамалар давомида кўплаб муаммоларга ечим топилади.
Ўтган йилги учрашувда Қашқадарё вилояти Деҳқонобод туманининг тоғли Оқработ қишлоғида интернет ва алоқа сифати ёмонлигидан шикоят қилинган эди. Ҳудудда биргина Uzmobile базавий станцияси бор, у ҳам юқори юкланиш туфайли доимий равишда ишламасди. Бунда нафақат интернет, балки оддий телефон алоқаси ҳам қаттиқ қийинчилик туғдирарди.
Ucell раҳбарияти муаммони эшитгач, масалани ҳал қилиш учун ваъда берди — “балки, келаси Янги йилга совға бўлар”.
Ваъда бажарилди
Куз фаслида компания қишлоққа антенна ўрнатди. Энди ушбу ҳудудда интернет ва телефон алоқаси муаммоси бартараф этилди. Одамлар қўнғироқ қилиш ёки интернетдан фойдаланиш учун тепаликка чиқиб югуришдан халос бўлди.
Қишлоқ аҳолиси ўзига янги имкониятларни очган ушбу ишдан мамнун. Интернет фақатгина алоқа учун эмас, балки таълим ва ишлаб чиқариш учун ҳам катта ёрдам бермоқда.
“Бу — қишлоғимиз аҳолисининг ҳозирги технологиялар даврида замон билан ҳамнафас яшаши учун яратилган яна бир имконият. Юқори тезликда ишловчи интернет, айниқса, ўқувчилар ва ёшлар учун жуда зарур эди. Бу орқали замонавий касблар ва хорижий тилларни онлайн дарслар орқали ўрганиш имконига эга бўлишди”, деб ёзди қишлоқ фаолларидан бири Жасур Назаров, ўзининг Facebook’даги саҳифасида.
Изоҳ (0)