Тошкент шаҳрининг Юнусобод туманидаги деҳқон озиқ-овқат бозори тўлиқ қайта қурилиши, беш баробар кенгайиб, бир нечта ҳудудлардан иборат замонавий савдо, бизнес ва дам олиш марказига айланиши маълум қилинганди. Кеча, 17 декабрь куни шаҳар ҳокимлиги масъуллари ва лойиҳачилар ушбу бозорда фаолият юритувчи тадбиркорлар билан учрашиб, лойиҳа тақдимотини ўтказди. Уларни қизиқтирган саволларга жавоб қайтарди. Бу ҳақда давра суҳбатида қатнашган “Дарё” мухбири хабар берди.
Лойиҳа жамоаси раҳбари Андрей Требунскихнинг маълумот беришича, бозор ҳудудида харидорлар ва тадбиркорлар учун катта муаммо бўлиб турган автотураргоҳ масаласига алоҳида эътибор қаратилган бўлиб, ҳудудда бир вақтда 1000 га яқин машинани сиғдирадиган ер ости ва ер усти автотураргоҳлари қурилади.
Масъулларнинг айтишича, қурилиш даврида бозор ўз фаолиятини тўхтатмайди, барча тадбиркорлар ишини давом эттиради. Уларга ишлаш учун имконият яратиб берилади.
Тошкент инвест компанияси раҳбари Баҳром Шокиров мазкур масалада очиқлик ва халқ билан мулоқот тамойилларига содиқлигини тасдиқлади.
Лойиҳа турк-сингапур лойиҳачилар жамоаси томонидан ишлаб чиқилган бўлиб, қишнинг совуқ ва ёзнинг жазирама иссиғи учун ёпиқ, харид қилишга қулай бўлиши айтилмоқда.
Тошкент шаҳар ҳокимлиги қошидаги Муниципал активларни бошқариш маркази ДУК раҳбари ўринбосари Камолиддин Расулов Юнусобод деҳқон бозорида фаолият юритувчи тадбиркорларнинг ҳеч бири ишсиз ва жойсиз қолмаслигини шахсан Тошкент шаҳар ҳокимининг ўзи маълум қилганини, тадбиркорларга дўкони учун янги дўкон берилишини, бозорнинг бузилиши даврида ҳам уларга ишлаш учун имконият яратилишини ваъда қилган.
Лойиҳачиларга Юнусобод бозорида фаолият юритувчи ҳеч қайси тадбиркор ишсиз ва жойсиз қолмаслиги кераклиги ҳақида талаб қўйилган. Қурилиш ишлари тугуганидан сўнг, ким шу ерда ишлаётган бўлса яна ижара шартнома қилиб, фаолият юритишини таъминлаймиз. Ҳеч қайси тадбиркор ишсиз қолмайди, ҳеч қаерга кетмайди, — деди Тошкент шаҳар ҳокимлиги қошидаги Муниципал активларни бошқариш маркази ДУК раҳбари ўринбосари Камолиддин Расулов.
Қўшимча қилинишича, янги бозор уч қаватли экобозорга айланади. Унинг ёнида ҳунармандлар ва заргарлар учун савдо майдонлари ва кўнгилочар марказга эга замонавий мегамолл пайдо бўлади. Умумий майдон 19 минг квадрат метрдан 94 минг квадрат метргача кенгаяди. Лойиҳа асосида 4-5 мингта иш ўрни яратилади.
Изоҳ (0)