Олий суд раиси ўринбосари Икром Муслимов суд иши бошлангунига қадар гумонланувчига нисбатан тергов органи ёки терговчи томонидан куч ишлатилишига чек қўйиш ҳақидаги саволга жавоб берар экан, “буни жорий қилиш мақсадга мувофиқ бўлади”, деди.
Кеча, 13 декабрь куни Олий суд раисининг биринчи ўринбосари — Жиноят ишлари бўйича судлов ҳайъати раиси Икром Муслимов ОАВ вакиллари билан учрашди.
Тергов судьяси институтининг вазифалари ва асосий йўналишларига бағишланган матбуот анжуманида сўз олган “Дарё” журналисти Ўзбекистонда суд мажлислари бошлангунига қадар тергов органи томонидан гумонланувчиларга нисбатан куч ишлатилиши ва босим ўтказилиши билан боғлиқ ҳолатлар юз беришини, тан-жароҳати олган гумонланувчилар суд залларида бу ҳақида судьяга билдиргач, тайинланган суд тиббий экспертизаси ҳам натижа бермаётгани ҳақида айтди.
2025 йил 1 январдан иш бошлаши кутилаётган тергов судьясига шундай муаммоларни тинглаб, унга қарши ечим топиш ваколатини бериш керакмикин? Кўп эшитганмиз одатда суд бошлангунига қадар ўтган фурсат давомида танадаги жароҳатлар битиб кетади, шу сабаб гумонланувчилар суд бошланганда судьяга бу ҳақида шикоят қилиб, суд тиббий экспертизаси тайинланса-да, бу ҳеч нарсани аниқламайди, — дея савол берди.
Журналист саволига қўшимча қилар экан, “Биз ъДок-1 Максъ иши билан боғлиқ судда айнан шундай ҳолатга дуч келдик. Судланувчилар судда тергов органи, терговчи томонидан уларга босим қилингани, ҳатто куч ишлатилгани билан боғлиқ ҳолатларни қайғули, дод солиб гапириб беришди. Минг афсуски, бу ҳолат беш-олти ой илгари бўлгани учун суд давом этаётган пайтда суд тиббий экспертизаси тайинланса-да, ҳеч қандай жароҳат кўринмаган. Суд давомида адвокатлар судланувчи танасида кўкарган ёки шилинган жойлар бўлса ҳам ўтган фурсат давомида битиб кетади дейишди. Янги иш бошлаётган тергов судьясига судга қадар ҳам шундай мурожаатларни тинглаб, унга қарши курашиш ваколати бериляптими?”, — деди.
Олий суд раиси саволга жавоб берар экан, “шахсга дастлабки тергов органи томонидан жисмоний, руҳий тазйиқ ўтказилган бўлса, судлар бу ҳолат юзасидан хизмат текшируви тайинлашга ва хулоса олишга мажбур”, — деди.
Икром Муслимов бундай тартибни жорий қилишни мақсадга мувофиқ деб ҳисоблашини қўшимча қилди.
Мен санкция бериш жараёнида бу нарсани ҳозирча эслолмадим. Агар у масалага тақаладиган бўлса, буни ҳам жорий қилиш мақсадга мувофиқ бўлади, — деди у.
“Док-1 Макс” судида Quramax Medical МЧЖ директори, ҳиндистонлик судланувчи С.Р.П., Фармацевтика тармоғини ривожлантириш агентлиги собиқ раҳбари С.К. лар тергов давомида қийноққа солингани, ғайриқонуний тарзда сўроқ қилиниб, руҳий ва жисмоний босимларга учраганини айтганди. Уларга нисбатан тайинланган суд тиббий экспертизаси эса, судланувчиларнинг танасида ҳеч қандай жароҳат излари йўқлигини билдирганди.
Изоҳ (0)