Исроил миллий хавфсизлик вазири Итамар Бен-Гвир масжидларда мусулмонларни намозга чақириш учун овозкучайтиргичлардан фойдаланишни тақиқлашни буюрди. Бу ҳақда The Times of Israel хабар берди.
Чора гўёки кўчадаги шовқинга қарши кураш доирасида жорий этилмоқда. Бироқ айрим расмийлар бу “диний низо”ни кучайтиришга қаратилганини таъкидлаган. Эндиликда полиция масжидларга кириб, овозкучайтиргичлар мусодара қила олади. Бундай овоз мосламаларидан азон айтиш учун фойдаланган масжидлар эса жаримага тортилиши мумкин.
Исроилнинг аралаш аҳоли яшайдиган шаҳарларидаги маҳаллий ҳокимият вакиллари Бен-Гвирнинг бу буйруғини “провокация” деб баҳолаган. Уларнинг фикрича, мазкур қадам можаро кучайишига, тартибсизликларга олиб келиши мумкин. Бен-Гвир қарорини қуйидагича изоҳлади:
Шовқин кўпчилик Ғарб мамлакатларида ва ҳатто араб давлатларида ҳам чекланади. Фақат Исроилда тартибсизлик ҳукм сурмоқда. Шубҳасиз, ибодат қилиш фуқароларнинг асосий ҳуқуқларидан бири, бироқ у атрофдагиларнинг ҳаёт сифатини ёмонлаштириш эвазига амалга оширилмаслиги лозим, деган у.
Кнессет (парламент) депутати Аҳмад Тиби мазкур қарорга норозилик белгиси сифатида ХADASH-ТААL ва RAАМ фракциялари номидан ҳукуматга ишончсизлик вотумини парламент муҳокамасига киритди.
Бен-Гвир диний урушни алангалатмоқчи. У полициянинг масжидларга бостириб киришини қўзғатмоқда, деган Тиби.
“Ликуд” депутати Дуди Амсалем ҳам миллий хавфсизлик вазирининг қарорига қарши чиқиб, барча диний урф-одатларни ҳурмат қилиш кераклигини айтди.
Итамар-Бен Гвирга санкция қўлланилиши мумкин
Европа Иттифоқи ва АҚШ Исроил миллий хавфсизлик вазирига қарши санкция қўллашни режалаштирмоқда. Бунга яҳудий вазири Ғазо сектори аҳолисига инсонпарварлик ёрдами етказиб беришни тўхтатишга чақиргани сабаб бўлган. Бен-Гвир шу йўл билан ҲАМАСни таслим бўлишга ундашни мўлжаллаган.
Изоҳ (0)