“Касалликка чалинганимни кеч билдик”. Ойхон Ифорзода қўрқинчли ташхис ортидан оёқлари ишламай қолгани ҳақида гапирди 

Телебошловчи ва актриса Ойхон Ифорзода ортиқча вазн тўплашининг сабаби касаллик билан боғлиқ бўлгани ҳақида гапирди.

— Баъзи одамлар ички ҳолатингизни билмай туриб, “Семириб кетибсиз”, деб танқид қилишади. Бунинг негизида нима ётганини ва нега озолмаётганини билмасдан туриб бундай савол бериш жуда ғалати. Балки ўйламай берилган савол ўша инсоннинг дардидир, деб ўйлаб ҳам кўришмайди.

Туғуруқдан сўнг шифокорлар ҳатто менга юришга ҳам чеклов қўйишди. Турмуш ўртоғимни “Аёлингиз бир умр аравачага михланиб қолиши мумкин”, деб жиддий огоҳлантиришди. Бу касалликка чалинганимни жуда кеч билдик, аммо бу ҳам яхшиликка бўлди. Агар илк туғуруқдан сўнг белимнинг дарз кетганини аниқлашганида, шифокорлар менга иккинчи болани дунёга келтиришга қаршилик қилган бўлишар экан. Иккинчи ўғлимни дунёга келтирганимдан кейин, туғуруқхонада оёқларим бирдан ишламай қолди. Кейин билсак, белим иккинчи томонидан ҳам дарз кетибди.

Жуда қийин кунларни бошдан кечирдим. Тўй, концертларда чиройли кўринишда саҳнага чиқасиз, аммо ичингизда ўтганини фақат ўзингиз ва энг яқин инсонларингиз билади, холос. Бир куни жуда қўрқинчли воқеа содир бўлди. Тўйхонадан чиқиб, эшик ёнига етганимда бирдан оёқларимни ҳис қилолмай қолганман.

Турмуш ўртоғим тўйимиз бўлганидан кейин қиз фарзандли бўлишни истарди. Аммо ўғилларимиз туғилгач, шифокорлар фарзанд кўришни тақиқлашди. Беш йиллик даволанишлардан сўнг таваккал қилишга қарор қилдим.

Спорт мураббийлари билан ишлаганда ҳам, албатта, касаллигим ҳақида айтиб ўтаман. Чунки жуда қийин кунларни бошдан кечирдим. Маслаҳатим — инсоннинг ичини билмай туриб, уни муҳокама қилманг. У ўзидан ўтганини ўзи билади, дейди Ойхон Ифорзода.