Лондон парламентига ўқ ўтказмайдиган жилет кийган ва икки катана (самурай қиличи) кўтариб келган эркак қўлга олинди. Бу ҳақда Telegraph хабар берди.
Маълум қилинишича, эркак 12 ноябрь куни Буюк Британиянинг собиқ бош вазири Борис Жонсон билан “суҳбатлашиш” учун келган. Ҳуқуқ-тартибот идоралари ходимлари 34 ёшли эркакни парламент биноси олдида ушлаган. Воқеа юз берган кунни ўзидаёқ у Вестминстер магистратура судида иштирок этган.
Прокурор судга айбланувчи Лондонга Кембриджширдан келгани, ўқ ўтказмайдиган жилет кийгани ва парламентга “Борис Жонсон билан учрашиш учун икки самурай қиличи билан келганини” айтган.
Таъкидланишича, 34 ёшли Льюис Эллингтон 12 декабрга белгиланган тингловгача гаров эвазига қўйиб юборилган. Унга Лондонга ташриф буюриш тақиқланган, айбланувчи судгача тиббий муассасада назоратда бўлади.
Борис Жонсон истеъфоси
Уч йил давомида Британия бош вазири лавозимини эгаллаб келган Борис Жонсон 2022 йил июль ойида, қатор жанжаллардан сўнг истеъфога чиққан эди. Сентябрь бошида Консерваторлар партияси янги сайловлар ўтказди, унда ўша пайтда Британия Ташқи ишлар вазирлигини бошқарган Лиз Трасс ғалаба қозонди. Бош вазир сифатида Трасс номақбул иқтисодий ислоҳотларни таклиф қилди ва 45 кундан кейин истеъфога чиқишга мажбур бўлди. Жонсон яна лавозим учун курашишга уриниб кўриши кутилганди, бироқ у бош вазирликка номзодини қўйишдан бош тортди.
Консерваторлар партияси раҳбари учун навбатдаги сайлов 24 октябрга белгиланган эди, аммо у ўтказилмади, чунки собиқ молия вазири Риши Сунак бош вазирликка ягона номзод бўлиб қолди. Овоз беришдан бир оз олдин, асосий рақиб, Жамоатлар палатаси раҳбари Пенни Мордонт Сунакни қўллаб-қувватлаб, ўз номзодини қайтариб олди.
4 июль куни Британия бўлиб ўтган парламент сайловларида Кир Стармернинг Лейбористлар партияси кўпчилик ўринни қўлга киритди. У Риши Сунакдан кейин Буюк Британиянинг бош вазири бўлди. Риши Сунакнинг Консерватив партияси эса 14 йиллик ҳукмронлиги давомида илк бор озчилик ўринни эгаллади.
Изоҳ (0)