Тожикистон президенти Эмомали Раҳмон мамлакатда президентлик бошқарув шакли танлангани сабабини тушунтирди. Бу ҳақда AsiaPlus хабар берди.
Сиёсатчига кўра, президентлик республикаси бошқарувнинг энг мос ва ишончли шакли бўлиб, Тожикистон тараққиётида ўз исботини топган. Эмомали Раҳмон конституция лойиҳасини ишлаб чиқиш мамлакатда фуқаролар уруши, тартибсизликлар ҳукм сурган, давлат ҳокимияти органлари фаолияти фалажланган бир пайтда бошланганини эслади.
“Бу баҳс-мунозаралар конституцияда давлат бошқаруви шаклини танлаш бўйича икки йўналиш — президентлик ва парламентар республика пайдо бўлишига олиб келди. Бу даврда биз учун энг муҳим масала Тожикистон яхлитлигини ҳимоя қилиш, халқ хавфсизлигини таъминлаш, жамиятда тинчлик ва осойишталикни сақлаш эди.
Тожик халқининг ижтимоий-иқтисодий, маданий-мафкуравий ҳаётининг ўзига хос хусусиятларини ҳисобга олган ҳолда ва бу оғир инқирозли вазиятдан чиқиш учун марказлашган, ягона ва тартибли кучли ҳокимият тизимини яратиш зарур эди, деди Эмомали Раҳмон.
Тожикистон президенти шу сабабли Конституциявий комиссия аъзолари президентлик республикасини танлаганини айтди.
“Натижада конституция лойиҳасида давлат бошқарувининг шакли сифатида президентлик республикаси таклиф этилди. Қадрли Тожикистонимизнинг кейинги тараққиёти давлатимизни бошқариш шаклини танлашда хато қилмаганимизни яна бир бор исботлади, дея қўшимча қилди Раҳмон.
Изоҳ (0)