Қурилиш объектини ташқи муҳандислик-коммуникация тармоқларига улаш мумкин бўлган қувватлар тўғрисидаги маълумотлар батафсил ёритилмаганлиги ёки коммуникация тармоқлари мавжуд эмаслиги натижасида аукцион савдоларига чиқарилган ер участкалари бир неча бор такроран савдоларга қўйилаётганлиги маълум бўлди. Бу ҳақда Макроиқтисодий ва ҳудудий тадқиқотлар институти хабар бермоқда.
Тадқиқотга кўра, аксарият туманларда ер участкаларини ижарага беришдан тушган маблағлар жорий йилнинг январь сентябрь ойларида ўтган 2023 йилнинг шу давридагига нисбатан ортган. Натижада ер аукционларида 1,9 трлн сўмлик бўш ер майдонлари сотилиб, унинг маълум қисми маҳаллий бюджетга йўналтирилган.
Республикадаги 67 та туман (шаҳар)да мулк ҳуқуқи асосида ер участкалари аукцион савдоларига умуман чиқарилмаган.
Тадқиқот муаллифлари аукцион савдоларини янада такомиллаштириш ҳамда расмий ер бозорининг қамровини кенгайтиришда урбанизацияни ҳисобга олишни таклиф қилган:
- ҳудудларнинг иқтисодий ривожланиш дастурлари, тасдиқланган шаҳарсозлик ҳужжатлари ҳамда урбанизация жараёнларини (ўсиш нуқталари) чуқур таҳлил қилган ҳолда, инфратузилма мавжуд бўлган ерларни аукцион савдоларига чиқариш;
- 2022 йилдан ҳозирги кунга қадар аукцион савдоларига чиқарилиб, ҳанузгача сотилмасдан турган барча лотларни (аксарият лотлар туман марказида жойлашган) аукцион савдоларидан чиқариб уларни бирлаштириб, жозибадор бўлган лойиҳаларни ишга тушириш учун ердан фойдаланиш мақсадини белгилаб, ижара ҳуқуқи билан қайта савдоларга чиқариш чораларини кўриш лозим.
Қўшимча қилинишича, “Ерелектрон” ААТга киритилаётган бўш ер участкалари бўйича таклифларни рад этиш асосларини қайта кўриб чиқиш керак.
Изоҳ (0)