“Янги ‘Ўткан кунлар’да суратга тушганим хатойим бўлди”. Гулчеҳра Жамилова тўйчи актриса бўлишни ўзига эп кўрмагани ва саҳнага қайтолмаслигининг сабаблари ҳақида гапирди (фото)

Ўзбекистон халқ артисти Гулчеҳра Жамилова “Изларим” кўрсатувига берган интервьюсида “Ўткан кунлар” фильмининг янги талқинида суратга тушиб хато қилгани ва саҳнага қайтолмаслигининг сабабларини очиқлади.

— “Ўткан кунлар” фильмининг янги талқинида рол ижро этиб адашдим, деб ҳисоблайман. Аввал бу ролни рад қилгандим. Чунки либосларнинг Марғилон услубида тикилмаганини кўриб, кўнглим ғаш бўлганди. Раҳматли режиссёр Шуҳрат Аббосов кўзимга қарамай, “Гулчеҳра, шуни ўйнанг. Бу энг яхши ролингиз бўлади”, дегани учун рад этолмагандим. Рости, кўнглим чопмай шу ролни ижро этишга мажбур бўлдим. Бу менинг хатойим бўлди, дейди Гулчеҳра Жамилова.

Гулчеҳра Жамилова нима учун саҳнадан кетгани ва қандай таклиф бўлса унга қайтиши мумкинлиги ҳақида гапирди

— Бугунги кунда яхши режиссёр ва асар бўлганида эди, битта спектаклда рол ижро этиш учун ҳам театр саҳнасига қайтардим. Ҳеч кимни камситмоқчи эмасман, аммо улардан кўнглим тўлмайди. Шукрки, фаолиятим давомида турли ролларни ижро этдим, шу билан бирга, саҳнадаги энг яхши ролим билан нафақага чиқдим — бу “Фиғон” спектакли эди. Бу худди меҳмондорчиликдан иззати борида кетишдек гап, дейди актриса.

Гулчеҳра Жамилова шунча йиллик фаолияти давомида бирор марта тўй хизматларини ўтказмагани ва буни нима учун истамаслиги ҳақида гапирди

— Тўғри, пул ҳаммага керак. Турмуш ўртоғим билан бир умр фақат қуруқ ойликка тирикчилик қилдик. Бир куни пулдан қийналиб турганимизда “Эҳ, ҳеч бўлмаганда чилдирма ҳам чалмабман”, деб кулдилар. Чунки иккимизнинг топганимиз бир кам-кўстни тўғриласак, иккинчисига етмай қоларди. Тасаввур қилинг, мен кундузи чаллар маросимини ўтказиб, кечки спектаклда Зебинисонинг ролини ижро этсам.

Хотин-халажнинг маросимида мени умуман бошқа қиёфада кўрган томошабинлар кечқурун тарихий образда кўриб, қандай қабул қилишади? Залда бир-бирига “Вой, бугун чалларида кўргандик” дедими, бошқаларнинг ҳам хаёли бузилади. Бундай муносабат менга тўғри келмайди. Шу боис ҳам тўй хизматларига боришни ўзимга эп кўрганим йўқ. Бундан ташқари, мен табиатан биров овқат еб ўтирганида, ўрнимда туриб оддий табрик сўзи ҳам айтишни истамайман. Буни менга нисбатан беҳурматлик деб биламан. Тўйга бораётган актрисалар қаддини урсин — эпласа ва ўзига маъқул бўлса, хизматларга бораверишсин, дейди Гулчеҳра Жамилова.