Россиялик мухолифатчи марҳум Алексей Навальнийнинг рафиқаси Юлия Навальная агар Россияга қайтса, президентлик сайловида ўз номзодини қўйишини айтди. Бу ҳақда BBC хабар берди.
Навальная президент Владимир Путин ҳокимият тепасида экан, орқага қайтиш “афсуски, имконсиз”лигини билдирди. Алексей Навальнийнинг беваси қўлга олиниши эҳтимоли туфайли ҳатто эрининг дафн маросимига ҳам Россияга кела олмаганини эслади.
Россияда Юлия Навальная 2021 йил сентябрь ойида Алексей Навальний ва унинг шерикларига нисбатан қўзғатилган иш доирасида “экстремистик ҳамжамият”да (ЖК 282.1-моддаси 2-қисми) иштирок этганликда айбланмоқда. 2024 йил июль ойида Басман суди Навальнаяни сиртдан ҳибсга олганди.
Алексей Навальний 2018 йилги Россия президенти сайловида ўз номзодини кўрсатмоқчи эди. Бироқ Марказий сайлов комиссияси уни “Кировлес” иши бўйича судлангани сабабли сайловга қўйишдан бош тортган. Сиёсатчи бу қарор устидан судга шикоят қила олмаган.
Навальний ўлими
Алексей Навальний Ямало-Ненец автоном округидаги колонияда вафот этгани ҳақида Федерал жазони ижро этиш хизмати 16 февраль куни хабар берган эди. Ўлим сабаби тромблар ёрилиши деб айтилган, аммо бу маълумот тасдиқланмаган. 17 февраль куни колония ходимлари сиёсатчининг онаси Людмила Навальнаяга унинг “тўсатдан ўлим синдроми”дан вафот этгани ҳақида хабар берган. Тиббий ўлим гувоҳномасида эса сиёсатчи “табиий сабаблар” туфайли вафот этгани қайд қилинган.
Навальнийнинг жасади 24 февраль куни онасига берилган. Бундан олдин терговчилар Навальнаяни шантаж қилиб, сиёсатчининг дафн маросимини яширин ўтказишни талаб қилган. Алексей Навальний 1 март куни Москвадаги Борисовский қабристонига дафн қилинган.
Изоҳ (0)