Дилшод Аҳмедов “Ўзбекистон металлургия комбинати” акциядорлик жамиятига янги раҳбар қилиб тайинланди. Бу ҳақда комбинат матбуот хизмати хабар берди.
Маълум қилинишича, 12 октябрь куни комбинат кузатув кенгаши раиси, бош вазир Абдулла Арипов раислигида ўтказилган йиғилишда Рашид Пирматов нафақага чиқиши муносабати билан ўз лавозимини тарк этаётгани, шунингдек, Дилшод Аҳмедовнинг комбинат бошқаруви раиси — бош директори лавозимига тайинлангани эълон қилинди.
Рашид Пирматов 2021 йилдан буён бошқарув раиси — бош директор лавозимида, жами корхонада ва мамлакат металлургия саноатида эса 38 йилдан бери ишлаб келаётган эди.
Дилшод Аҳмедов И.М.Губкин номидаги Россия давлат нефть ва газ университети ва Москва “Сколково” бошқарув мактабини тамомлаган. У 2021 йил январь ойидан бошлаб бошқарув раисининг биринчи ўринбосари — ижрочи директор лавозимида ишлаган.
Дилшод Аҳмедов 2024 йил январь ойидан буён инвестициялар, саноат ва савдо вазирининг ўринбосари, жумладан, кузатув кенгаши раисининг ўринбосари сифатида комбинатнинг тараққиёт жараёнларини назорат қилиб келган.
Изоҳ (0)