Фарзанд туғилиши билан оила аъзоларининг ҳаёти тубдан ўзгариб кетади. Уйга келган жажжи меҳмон кўп жиҳатдан аёлнинг ҳаётини мураккаблаштиради. Одатий кун тартиби, овқатланиш қоидаларидан тортиб барча одатлар ўзгаради. Бундай вазиятда ота-оналар ҳаётини енгиллаштирадиган турли гаджетлар, ускуналар ва мебеллар ёрдамга келади.
Бутилка стерилизатори
Чақалоқларни овқатлантириш учун мўлжалланган шиша ёки пластик бутилкаларни доим қайнатилган сув билан ювишга вақт топилмаслиги мумкин. Бундай ҳолатда оналарга махсус стерилизатор ёрдам беради. У нафақат чақалоқ идишларини ювади ва тозалайди, балки сутни иситиш функциясига ҳам эга. Стерилизаторни ёқилган ҳолатда қолдириб кетишдан хавотир олмасангиз ҳам бўлади, ишлаб бўлгач, гаджет автоматик равишда ўчади.
Мониторли видео-энага
Оналар ўзларига бир оз вақт ажратиш керак бўлганда ва чақалоқни ташлаб кетишга ҳеч ким бўлмаганда мониторли видео-энага ёрдамга келади. Камера боланинг ёнида ўрнатилади. Шунда бошқа хонадан экран орқали чақалоқ аҳволини кузатиб туриш мумкин.
Наклейка кўринишидаги термометр
Афсуски, ёш болалар турли вируслардан ҳимояланмаган бўлади ва касал бўлиб туради. Чақалоқ тана ҳароратини тез-тез ўлчаш зарурати туғилганда ноқулай симобли термометр ўрнига наклейка кўринишидаги термометрдан фойдаланиш мумкин. Улар боланинг пешона қисмига ёпиштирилади. Наклейка 35 даражадан 40 даражагача бўлган ҳароратни кўрсатади.
Ўйинчоқларни сақлаш учун гилам-қоп
Болали уй бозор деганларидек, ёш болалар бор хонадонда албатта ўйинчоқлар сочилиб кетиши табиий ҳолат. Уларни кунига бир неча марта қайта йиғиш ва ёйишга вақтни зое кетказмалик учун гилам шаклидаги махсус қоплардан фойдаланиш мумкин. Диаметри 1,4 метр бўлган гиламча устида бола ўйнаб бўлгач, унинг учларидаги иплар тортилади ва барча ўйинчоқлар қоп ичида қолади.
Сайр учун болалар кишани
Кўринишидан ушбу кашфиёт қўпол туюлсада, гавжум жойга болалар билан ташриф буюришни осонлаштиради. Айниқса, сайр вақтида ота-она қўлини ушлашни ёқтирмайдиган, доим турли томонларга югуриб кетадиган шўх болалар учун ушбу кишан асқатади. Кишаннинг бир томони онага, иккинчи қисми эса боланинг қўлига тақилади.
Болалар рацияси
Мактабгача ёшдаги болалар билан саёҳат қилганда, велосипед, самокат билан сайр қилганда ёки беркинишни тақозо қиладиган ўйинлар ўйнаганда ушбу гаджет керак бўлади. Эндиликда бола кўздан ғойиб бўлганда уни топиш учун баланд овозда чақириш шарт эмас. Рация фарзандингиз билан доим алоқада қолишга ёрдам беради. Девайс батарейкалар билан ишлайди ва уч километргача бўлган масофада сигналларни қабул қилади.
Болалар учун ақлли соатлар
Мактаб ўқувчилари, балоғат ёшидаги болаларни қаерда эканини билиш ва улар билан доимий алоқада бўлиш учун ақлли соатлардан фойдаланиш мумкин. Қурилмада видео ва аудио алоқа мавжуд ва смартфонга уланмасдан ишлайди, соатга иккинчи SIM-картани ҳам улаш мумкин. Унда боланинг қаерда эканини назорат қилиш мумкин бўлган GPS функцияси айни кераклидир.
Кир қуритиш машинаси
Кир ювиш машинаси кийимларингизни тозалаб берса, қуритиш машинаси уларни уйда ёки кўчада ёйиб қуритиш ташвишидан қутқаради. Бу машиналар барабанининг материалига (пластик ёки металл) кўра, қўшимча функциялари, махсус дастурлари, болалардан ва ҳимояси мавжудлигига кўра фарқланади.
Ушбу техника, айниқса, серфарзанд хонадонларда — мунтазам тарзда ва кўп миқдорда кир ювишга тўғри келадиган бўлса жуда асқатади. Шунингдек, бир қатор қуритиш машиналари кийимни буғ ёрдамида зарарсизлантириш функцияси эга: бунда вируслар, бактериялар ва касаллик келтириб чиқарувчи бошқа микроорганизмлар йўқ қилинади. Уларни бошқа мақсадларда, масалан, болаларнинг юмшоқ ўйинчоқларини тозалаш, кундалик кийиладиган кийимларни енгил тозалаш учун ҳам қўлласа бўлади. Шунингдек, қуритиш машинаси бор хонадонда чанг кам бўлади.
Изоҳ (0)