“Ўқитувчилар қизларни дўппи кийишга мажбурлашга ҳақли эмас” — Тожикистон Таълим вазирлиги

Тожикистон Таълим ва фан вазирлиги ўқувчи қизларнинг мактабларда дўппи кийиши мажбурий эмаслигини маълум қилди. Вазирлик бу тавсиявий характерга эгалигини билдирди. Бу ҳақда Asia-Plus хабар берди.

Душанбе шаҳрида ўқувчи қизларни дўппи кийишга мажбурлаш ҳолатлари кузатилган. Баъзи ота-оналар дўппиларнинг маданий аҳамияти ва иссиқдан ҳимоя қилишини таъкидлаб, буни ёқлаган. Бошқалари эса болаларга ноқулайлик туғдиришини айтган.

Қизи 66-мактабда ўқийдиган ижтимоий тармоқ фойдаланувчисининг айтишича, раҳбарият ҳар куни эшик олдида туриб, бош кийимсиз қизларни киритмайди.

“Тўғрисини айтсам, менга бу дўппилар ёқмайди. Биринчидан, улар жуда ноқулай, иккинчидан, ҳар куни фақат кимгадир ёқиш учун уларни кийиш ақлга сиғмайди. Менимча, 16-17 ёшли қизларни дўппи кийишга мажбурламаслик керак, чунки улар буни хоҳламайди. Байрам кунларида кийса бўлади, аммо ҳар куни эмас”, деган у.

Мактаб директори ўринбосари Шерзод Тешабоев дўппи мажбурий эмаслигини, бош кийимсиз қизлар мактабга кириши тақиқланмаганини айтди. У 5-синфдан 11-синфгача бўлган ўқувчилар дўппи кийишини билдирди.

Таълим ва фан вазирлиги эса ўқитувчилар, мактаб директорлари дўппи кийишга мажбурлаш ҳуқуқига эга эмаслиги, у фақат тавсия этилишини маълум қилди.

Тожикистонда ўқувчи қизларнинг кийим-кечагига бир қатор талаблар қўйилган. Ушбу меъёрларга мувофиқ, ўқувчи қизларга ҳижоб, тор ва йиртилган жинси шим, мини ва тор юбка кийиш, шунингдек, ёрқин макияж қилиш тақиқланади. Миллий рўмол ва дўппига эса рухсат берилади. Ўқувчи қизларга, шунингдек, татуировка қилиш, реклама ёзувлари ёки бошқа мамлакатларнинг давлат рамзлари акс этган футболкаларни кийишга рухсат этилмайди.