Ўзбекистонда 2030 йилгача 30 миллиард долларлик давлат-хусусий шериклик лойиҳаларини амалга ошириш бўйича катта дастур қабул қилинган. Бу ҳақда президент 25 сентябрь куни Самарқандда ўтаётган Осиё инфратузилмавий инвестициялар банки Бошқарувчилар кенгаши тўққизинчи йиллик йиғилишида сўзлаган нутқида айтиб ўтди.
Хусусан, Тошкент —Самарқанд ва Тошкент—Андижон йўналишларида пулли автомобиль йўллари, Тошкент—Самарқанд, Самарқанд—Навоий—Бухоро йўналишларида тезюрар поездлар учун янги темирйўл қуриш лойиҳалари амалга оширилишини маълум қилди.
Республиканинг 6 та халқаро аэропортини модернизация қилиш давлат-хусусий шерикликка берилади.
Шунингдек, келгуси 5 йилда электр, сув ва газ тақсимлаш тармоқларини бошқариш хусусий операторларга ўтади. Масалан, Самарқанд вилоятининг электр тармоқларини бошқарувга олиш бўйича ўтказиладиган тендерга 50 дан зиёд хорижий нуфузли компаниялар ўз қизиқишини билдирди.
Шу билан бирга, бизда ҳар йили 100 мингдан зиёд хонадонли уй-жойлар қурилмоқда. Масалан, Тошкент, Самарқанд, Наманган ва Андижон каби йирик шаҳарлар ҳамда қолган вилоятлар марказларига йўлдош “Янги Ўзбекистон” шаҳарчаларини қуриш бўйича катта лойиҳалар амалга оширилмоқда.
Президент ўрта шаҳарларни ривожлантириш бўйича 200 миллион долларлик, қишлоқ жойларидаги инфратузилмани яхшилаш бўйича 130 миллион долларлик лойиҳалар Осиё инфратузилмавий инвестисиялар банки билан ҳамкорликда бошлаганганини алоҳида эътироф этди.
Банк ва бошқа ҳамкорлар билан бундай инфратузилмавий лойиҳалар янада кенгайтирилишига ишонч билдирди.
Тошкент—Самарқанд пулли магистрал автомобиль йўлларини қуриш ишлари 2024 йилда, Тошкент—Андижон йўлини қуриш ишлари 2026 йилда бошланади. Бу ҳақда “Ўзбекистон Республикасида 2024—2030 йилларда давлат-хусусий шерикликни ривожлантириш чора-тадбирлари тўғрисида”ги президент қарорида белгиланди.
Тошкент—Андижон пулли йўли пойтахт ва бошқа ҳудудларни Фарғона водийси билан боғлашга ёрдам беради. Лойиҳанинг умумий узунлиги 314 километр бўлиб, унинг қиймати 4,65 миллиард долларни ташкил қилади.
Изоҳ (0)