“Ёшларнинг сочи тўкилмоқда, сариқ касаллик авжида”. Тошкентда суякдан балиқ еми ишлаб чиқарувчи корхона одамларни бездирмоқда

Тошкент вилояти, Тошкент туманидаги “Зоғариқ” маҳалласи, Чиғатой кўчасида жойлашган суякдан балиққа ем ишлаб чиқарувчи корхона шу ҳудудда яшовчи аҳолини бездирмоқда. Бу ҳақда “Дарё” журналистига гапириб берган аҳоли вакилларига кўра, корхонадан чиқаётган бадбўй ҳид уларни тоза ҳаводан мосуво қилмоқда. 

20 минг нафардан ошиқ аҳолига эга бўлган 4 та маҳаллада яшовчи халқ 2019 йилдан бери шу суякдан балиқ еми ишлаб чиқарувчи корхонага қарши курашамиз. Аммо натижа йўқ. Мурожаат қилмаган жойимиз қолмади. Корхонадан чиқаётган бадбўй ҳид оқибатида ҳозирги кунда ёшларимизнинг сочлари тўкилиб кета бошлади. Юқумли касалликлар кўпайди, сариқ касаллиги авжига чиқди. Ҳамма норози. Шу корхонадан 300 метр узоқликда боғча бор. 3000 нафар бола таълим-тарбия оладиган мактаб ишлаб турибди. Ҳарбий қисм бор. У ердаги 24 та хонадон вакиллари ҳам шу корхонадан чиқаётган бадбўй ҳиддан безор бўлган. Биз сизлар орқали раҳбарларга мурожаат қилиб, шу суяк цехини одамлардан узоқ жойга кўчириб беришларини сўраган бўлардик, дейди мурожаатчилардан бири Жаҳонгир Ҳакимов. 

Суҳбатдошнинг айтишича, унинг хонадони шу корхонадан 500 метр узоқликда жойлашган бўлиб, бадбўй ҳид сабаб аёли касалликка чалинган ва айни кунда тўшакка михланиб қолган. 

Экологияга, СЕСга мурожаат қилдик. СЕС ёпиб кетади, яна очиб ишлайверади. Тадбиркор президентимиз яратиб бераётган имкониятдан фойдаланиб, халққа зарар бермаган ҳолда ишлаши керак-ку, дейди Жаҳонгир ака. 

Шу маҳаллада яшовчи Холида Ғаниеванинг айтишича, корхонадан чиқаётган бадбўй ҳид кекса қайнонасининг соғлиғига ёмон таъсир қилиб, ўсимта чиқишига сабаб бўлган. Ва охири кекса аёлнинг ўлимига олиб келган. 

Шунинг ҳидига қари қайнонамнинг нафас йўлларида ўсимта ўсиб чиқди. Раҳматли қайнонам шу дард билан ўтиб кетди. Бугунги кунда менда ҳам шу касаллик бор. Аёл бошимиз билан ҳеч кимга ҳеч нарса деёлмаймиз. Ўзимиз дори-дармон қилиб юраверамиз. Шу ҳиддан жудаям безор бўлдик, дейди Холида Ғаниева. 

Жаҳонгир Ҳакимовнинг аниқлаштиришича, бадбўй ҳид таратаётган корхонада суяклар қайнатилиб, унга ўхшаш кукун тайёрланади. 

Ўзини корхонанинг масъули деб таништирган Азиз исмли фуқаронинг айтишича, корхонада илгари суяк қайнатилган. Айни кунда корхонанинг суяк қайнатадиган техникалари йўқ, бунақа иш тўхтатилган. 

2007 йилдан бери балиқларга омихта ем ишлаб чиқарамиз. Бизда айни кунда суяклар қайнатилмайди. Тайёр қайнатилган суякларни олиб келиб, уларга қўшимчалар қўшиб, балиқлар учун емаклар тайёрлаймиз. Бадбўй ҳид биздан чиқаётган ёки чиқмаётганини билмайман, дейди корхона масъули. 

Масъулнинг билдиришича, корхонанинг ишлаб чиқариши лаборатория текширувидан ҳам ўтказилган. Лекин ҳеч қандай муаммо чиқмаган. 

Экология ва СЕС келиб, 3 кун текширишди. Лекин ҳеч қандай муаммо чиқмади. Ҳатто атрофдаги одамларнинг хонадонини ҳам бориб текширишди, дейди у. 

Тошкент тумани Санитария-эпидемиологик осойишталик ва жамоат саломатлиги марказида бўлим мудири сифатида фаолият юритувчи Нурмуҳаммад Абдуллаевнинг ОАВ вакилларига маълумот беришича, суяк цехи фаолияти йиллар давомида можарога сабаб бўлиб келган. 

Бизга бу масалада жуда кўплаб мурожаатлар тушгач, бизнес-омбудсмандан рухсатнома олиб, текширдик. Натижа вилоят бошқармамизга берилди ва бошқарма номидан судга мурожаат қилинди. Суд Тошкент тумани Санитария-эпидемиологик осойишталик ва жамоат саломатлиги маркази ходимлари ўрганган хулосадан келиб чиқиб, тадбиркор шу талабларни бажариши керак, шундан сўнг фаолиятини давом эттирса бўлади, деган тўхтамга келди. Қолаверса, бу цех аҳолига 500-600 метр узоқликда жойлашган. Аслида, ўртадаги масофа камида 1000 метр бўлиши лозим. Корхона эгалари суддан сўнг, талабларни бажаришга уриниб кўришди, ҳаракат қилишди. Аммо масофа ўша-ўшалигича қолди, дейди Нурмуҳаммад Абдуллаев.

Масъулга кўра, суд қарорига кўра талабларни бажармаган цех фаолияти МИБ томонидан тўхтатилиши белгиланган.

Аҳоли эса корхонада ишлаб чиқариш ҳамон давом этаётганини, МИБ ўз вазифасини бажармаётганини таъкидламоқда.