Касбилик ёшлар эндиликда Татаристоннинг Қозон шаҳрида ишлаб даромад топиши мумкин

Қашқадарё вилоятининг Касби тумани ёшларига Татаристоннинг Қозон шаҳрида ишлаб, даромад топиш имконияти яратилди. Бу ҳақда туман ҳокими Тўхтамурод Мейлиев ва Alabuga Start лойиҳаси ташкилотчилари ўртасида тузилган ҳамкорлик меморандумида сўз борган. 

Туман ҳокими ўринбосари Темур Поёновнинг “Дарё”га билдиришича, томонлар ўртасида халқаро ҳамкорликни мустаҳкамлаш, қишлоқ хўжалиги ва саноатни ривожлантириш, меҳнат миграцияси алоқаларини ташкил этиш бўйича меморандум имзоланган.

“Меморандум имзолашдан асосий мақсад — қишлоқ хўжалиги, озиқ-овқат ва саноатни ривожлантириш, меҳнат миграцияси алоқаларини янада кучайтириш, шунингдек, томонлар ўртасида доимий равишда ҳамкорлик алоқаларини олиб боришдан иборат. Шу мақсадда бугун ёшлар билан мулоқот қилиб, ушбу меморандум доирасида тумандаги ишсиз ёшларни ушбу халқаро дастур орқали иш билан таъминлаш ҳам кўзда тутилганини айтдик. Ёшларда қизиқиш жуда кучли”, дейди ҳоким ўринбосари.  

Касби туманидаги “Ёшлар ва маънавият маркази”да мазкур халқаро дастурга қизиқиш билдириб, хорижда меҳнат қилиш истагини билдирган ёшлар билан учрашув ҳам ташкил этилган. 

“Учрашув давомида хорижда ишлаш истагини билдирган ёшларга бугун дунёда содир бўлаётган воқеалар, хорижда меҳнат қилиш тартиб-қоидалари атрофлича тушунтирилди. Шунингдек, у ердаги иш шароитлари ва маошлар ҳақида ҳам маълумот берилди”, дейди масъул.