5 мингдан 50 минг сўмгача: Чиноздаги балиқ бозоридан репортаж

Ўзбекистонда яна балиқ овига рухсат берилиб, балиқхўрлик мавсуми бошланди. Мавсум боши бўлгани боисми, айни кунда пойтахтдаги кўплаб емакхоналарда хўрандаларнинг асосий танловларидан бири бўлган зоғора (сазан) балиғи ҳам ҳамёнбоп нархларда сотилмоқда. Нари борса 90-100 минг сўмдан хўрандаларга тортилаётган зоғора балиқ Ўзбекистондаги энг йирик балиқ бозорларидан бири — Чиноз балиқ бозорида ҳолатига қараб 20-28 минг сўмдан 45-50 минг сўмгача сотилмоқда. “Дарё” журналисти ушбу бозорда бўлиб, айни кунда бозорда сотилаётган балиқлар нархи билан қизиқди.

“Бу бозорга 2 турдаги — Айдар Арнасой кўлидан тутилган ва балиқчилик хўжаликларида етиштирилган балиқлар олиб келинади. Кўлдан тутилган балиқларнинг нархи анча қимматроқ бўлади. Балиқчилик хўжаликларида етиштирилган балиқлар эса уларга нисбатан анча арзон сотилади”, дейди балиқ сотувчиларидан бири.

Суҳбатдошнинг маълумот беришича, табиий ҳавзалардан тутилган Африка лаққа балиқларининг айни кундаги нархи 28 минг сўмдан бошланади. Вазни катта лаққа балиқлар эса 50 минг сўмгача сотилмоқда.

“Умумий оғирлиги 6 килограммгача бўлган Африка лаққа балиқлари баъзи сотувчилар томонидан 20-25 минг сўмдан ҳам сотилмоқда. Мавсум боши бўлгани учунми, бозорда нархлар анча арзон. Масалан, зоғора (сазан) балиқнинг каттароғи 20-25 минг сўмгача ҳам сотилмоқда”, дейди у.

Янги Чиноз балиқ бозори масъулларидан бири Рустам Қодировнинг журналистга маълумот беришича, бозорда айни кунда лаққа, чўртан, карас, дўнгпешона (толстолобик), зоғора, амур, илон балиқ каби турлари сотилмоқда.

“Бозоримиз мавсум бошидан бери эрталабдан кечгача давом этмоқда. Кунига 40-50 тонна балиқ сотилмоқда. Водий вилоятларидан келаётганлар, шунингдек, табиий ҳавзалардан балиқ тутувчиларнинг таклифига кўра, эндиликда бозорни кечки пайт 4-5 ларда бошлашни режалаштириб турибмиз. Сабаби водий вилоятларидан келувчилар тонгда бемалол йўлга чиқиб, бозор бошлангунча кириб келишса, табиий ҳавзалардан балиқ тутувчилар эса тонг пайтида совуқ сувга киришдек машаққатдан қутилади. Эрталаб бемалол балиқ овига чиқиб, бозор бошлангунча анча балиқ тутиб келишади”, дейди Рустам Қодиров.

Балиқ сотувчиларидан бирининг айтишича, айни кунда зоғора балиқларни табиий ҳавзалардан тутиш қийин. Бозордагилари асосан балиқ ҳавзаларида етиштирилган балиқлар ҳисобланади. Мўйловли лаққа балиқларини эса табиий ҳавзалардан топиш мумкин. Бироқ у жуда харидоргир бўлгани боис, кўплаб сотувчилар балиқ ҳавзаларида етиштирилган мўйлови кўп лаққаларнинг мўйловини кесиб ташлаб, тоқ мўйлов қилган ҳолда харидорларни алдаб сотишни одат қилган.

“Сув ҳавзасидан тутилган мўйловчи лаққа балиқда битта мўйлов бўлади. Балиқ ҳавзаларида етиштирилган лаққа балиқларда эса мўйлов кўп бўлади. Бу балиқ харидоргир бўлгани боис, айрим сотувчилар сув ҳавзаларида етиштирилган лаққа балиқларнинг мўйловини кесиб ташлаб, харидорларга сув ҳавзаларида тутилган балиқ, дея алдаб сотмоқда. Харидорлар шунга жуда эътиборли бўлишлари керак”, дейди балиқ сотувчи.

Бозор раҳбариятининг билдиришича, балиқ бозорига келтирилган балиқлар аввалига ҳудуддаги лаборатория текширувларидан ўтказилиб, истеъмолга яроқлилиги ўрганилади. Шундан сўнг сотишга рухсат берилади.