Исроил армияси Ливандаги “Ҳизбуллоҳ” ҳаракати жангчилари ва инфратузилмасига қарши профилактик зарбалар бериш билан бирга шимолий жабҳада ҳужум операцияларига фаол тайёргарлик кўрмоқда. Бу ҳақда Исроил армияси штаб бошлиғи Герзи Ҳалеви хабар берди.
Голан тепаликларидаги хавфсизлик ҳолатини баҳолаган Ҳалеви, Исроил кучлари ўтган бир ой ичида кўплаб “Ҳизбуллоҳ” жангчиларини ўлдирганини ва ҳаракатнинг Ливандаги катта миқдордаги ҳарбий инфратузилмасини йўқ қилганини қайд этган.
“Шимолий қўмондонлик Исроил армиясининг барча имкониятларидан фойдаланган ҳолда, улар бизга ҳужум қилишдан олдин Ливандаги “Ҳизбуллоҳ”нинг нишонларига зарба бермоқда ва шу билан бирга биз бу майдонда ҳужумкор ҳаракатларга тайёргарлик кўрмоқдамиз”, деди исроиллик ҳарбий қўмондон.
Унинг қўшимча қилишича, шимолдаги аҳолига, хусусан, Голан тепаликларига таҳдидларни камайтириш учун “Ҳизбуллоҳ”га қарши зарбалар комбинацияси жуда муҳимдир.
Исроил кучлари мамлакат ҳудудига зарба беришга тайёрланаётганини пайқагач, 25 август куни “Ҳизбуллоҳ” нишонларига олдиндан зарба бериб, минглаб ракеталарни йўқ қилган эди. Исроил ҳарбийларининг маълум қилишича, “Ҳизбуллоҳ” объектлари ва қуролларини йўқ қилиш амалиётида 100 га яқин самолётлар қатнашган.
“Ҳизбуллоҳ” ўша куни Исроилга 320 дан ортиқ ракета ва дронлар учирганини маълум қилган.
Исроил армиясининг “Галей ЦАХАЛ” радиостанцияси хабар беришича, январь ойидан буён Ливандан Исроилга қарата 6,6 мингдан ортиқ ракеталар, снарядлар ва дронларнинг учирилиши қайд этилган.
Изоҳ (0)