Ҳаррис номзодининг илгари сурилиши Украинага 50 миллиард долларлик кредит ажратилишини секинлаштиради — Politico

АҚШ ва Европа Иттифоқи ўртасида Украинага июнь ойида тасдиқланган 50 миллиард долларлик кредит бўйича келишмовчиликлар давом этмоқда.

Эндиликда Оқ уйнинг амалдаги раҳбари Жо Байденнинг президентлик пойгасидан чиқиши туфайли бу келишмовчиликлар кредитнинг узилишига олиб келиши мумкин, деди Politico нашрига исм-шарифини ошкор этмаган икки европалик амалдор.

Politico нашрининг ёзишича, Америка ва Европа расмийлари Республикачилар партиясидан президентликка номзод Дональд Трамп ғалаба қозонса, маблағ ажратишга халақит беришидан қўрқишган. Шу сабабли, улар давом этаётган келишмовчиликларга қарамай, кредитни тезлаштиришга қарор қилишганди.

Бироқ Байденнинг номзоди вице-президент Камала Ҳаррис билан алмаштирилиши вазиятни ўзгартирди. Европа ва Америка расмийлари, Politico суҳбатдошларига кўра, Ҳарриснинг ғалабасига ишончи комил ва энди шошилинч кредитга эҳтиёж сезмаяпти.

Июнь ойида AFP ва Bloomberg Елисей саройидаги манбага таяниб, кредит Украинага шу йил охиригача берилиши кераклигини ёзган эди. Уни Россиянинг музлатилган активларидан олинадиган фойда ҳисобига қоплаш режалаштирилган.

Музлатилган Россия активларининг учдан икки қисмидан кўпроғи Бельгия депозитари Euroclear ҳисобларида сақланади. 2023 йилда ушбу маблағлар 4,4 миллиард евро фойда келтирди.

АҚШ Европа Иттифоқидан Россия Украинага товон тўламагунча маблағларга тегмаслик кафолатини талаб қилмоқда. Европа Иттифоқи, ўз навбатида, бу талабни бажара олмайди. Politico бунинг учун Европа Иттифоқига аъзо барча давлатларнинг розилиги кераклигини ёзмоқда.