Қашқадарёда Ўзбекистон мустақиллигининг 33 йиллигига бағишлаб ўтказилган “Энг улуғ, энг азиз” анъанавий республика кўрик-танловининг ҳудудий босқичи ғолиблари орасида ҳакам ҳам бор. Бу ҳақда “Дарё”га журналист Тўлқин Тўрақулов хабар берди.
![](/static/2024/08/30/photo_2024-08-23_17-04-41-bqjtzXXY.jpg)
“Энг улуғ, энг азиз” анъанавий республика кўрик-танловига ҳужжатларни қабул қилиш жараёни бошлангани ҳақидаги эълонни ўқигач, менда ҳам мазкур танловда қатнашиш иштиёқи туғилди ва 2023 йилнинг 1 августидан 2024 йилнинг 1 августигача бўлган даврда Қашқадарё телерадиокомпанияси “Олтин воҳа” радиоси орқали эфирга узатилган 10 дан ортиқ эшиттиришларимни Ўзбекистон Журналистлар уюшмаси Қашқадарё вилояти бўлимига топширдим. 2024 йил 21 август куни ғолибларни тақдирлаш маросими бўлиб ўтди. Танловнинг “Ёзувчи ва шоирларнинг бадиий асарлари” йўналишида ҳакамлар ҳайъати аъзоси Ўзбекистон Ёзувчилар уюшмаси Қашқадарё вилояти бўлими раҳбари Ғулом Абдиев 1-ўринга лойиқ кўрилиб, диплом ва қимматбаҳо совға билан тақдирланганини қандай изоҳлаш мумкин? Ҳакамлар ҳайъати аъзоси ўзини ғолиб деб топиши ғалати эмасми?, дейди журналист.
Тўлқин Тўрақуловнинг маълумот беришича, Ўзбекистон Журналистлар уюшмасининг Қашқадарё вилояти бўлими раҳбари Галовиддин Йўлдошев танловга қашқадарёлик шоир ва ёзувчилар, журналист ва блогерлар, рассом, дизайнер ва фотографларнинг 200 дан ортиқ ижодий ишлари қабул қилинганини айтган.
![](/static/2024/08/30/photo_2024-08-23_17-06-31-lq_egp4O.jpg)
Галовиддин Йўлдошев барча ишлар Ўзбекистон журналистлари ижодий уюшмаси, Ёзувчилар уюшмаси, “Тасвирий ойина” ижодий уюшмаси, Ўзбекистон Бадиий академияси вилоят бўлимлари масъулларидан таркиб топган ҳакамлар ҳайъати томонидан кўриб чиқилиб, “Босма оммавий ахборот воситалари ходимларининг журналистик ишлари”, “Ёзувчи ва шоирларнинг бадиий асарлари”, “Интернет-журналистика”, “Кино санъати асарлари”, “Телевидение ва радио ижодкорларининг материаллари”, “Тасвирий санъат, фото асарлари ва дизайн ишлари” каби номинациялар бўйича ғолиблар аниқланганини айтди. Кўп ўтмай тадбир иштирокчиларига ҳакамлар ҳайъати аъзоси сифатида таништирилган Ғулом Абдиев ғолиблар сафида ҳам борлиги маълум бўлди, дейди Тўлқин Тўрақулов.
Журналист танлов ўтказилишига эътироз билдирар экан, “Танлов низомига кўра, ўтган уч йил давомида ғолибликни қўлга киритганларнинг ижодий ишлари кўриб чиқилмайди, дейилганди. Афсуски, танлов жараёнида бу талабга ҳам амал қилинмади. Ҳатто 2022 ва 2023 йилларда ҳам танловда иштирок этиб, ғолиблар қаторидан жой олган баъзи ижодкорлар бу йил ҳам қатнашиб, биринчи ва иккинчи даражали диплом билан тақдирланганини қандай тушуниш мумкин?, дейди.
![](/static/2024/08/30/photo_2024-08-23_17-06-32-v90EvvMq.jpg)
Тўлқин Тўрақуловнинг қўшимча қилишича, бу йилги танловда 1-, 2- ва 3-ўринлар иккитадан бўлиб, масъул бу орқали ўзи раҳбарлик қилаётган, ташкил топганига ҳали олти ой ҳам бўлмаган “Маҳалла 7лиги” газетаси ходимларини рағбатланлантирган.
Тадбир якунида сўзга чиққан “Ўзбекистон 24” телерадиоканали катта муҳаррири Шоира Умрзоқова телерадиокомпанияда ишловчи тасвирчилар, монтаж усталари танловда қатнашмаётганини, кейинги йилда улар учун ҳам қўшимча алоҳида номинация ташкил этиш бўйича ҳозирда ўз таклифини илгари сураётганини билдирди. Шу пайт Ўзбекистон Журналистлар уюшмаси Қашқадарё вилояти бўлими раҳбари Галовиддин Йўлдошев ўзича қарор чиқариб, “Бу номинацияни биз ҳозир шу ернинг ўзида ташкил қиламиз?”, деб тадбирни ёритиш учун келган Қашқадарё вилоят телерадиокомпанияси тасвирчиси Санжар Мўминов ҳамда “Насаф” телеканали тасвирчиси Ёрқин Сувоновларни ёнига чақириб, “Бу иккови бу йилги танловнинг ғолиби”, дея эълон қилди. Энг ачинарлиси, уларга бошқаларнинг дипломини топшириб, бу жараённи телевидение ва расмларга олдирди. Афсуски, ушбу тасвирчиларга ҳозирга қадар дипломи берилгани йўқ, дейди у.
Изоҳ (1)
Yashang,toʻgʻri yoʻldan ketyapsizlar