Саудия Арабистонининг Макка шаҳридаги шифохоналардан бирида февраль ойидан буён даволанаётган ўзбекистонлик ватанга қайтарилди. Бу ҳақда “Дунё” хабар берди.
Ўзбекистоннинг Жидда шаҳридаги Бош консулхонаси маълумотига кўра, у шу йилнинг январь ойида оила аъзолари билан зиёрат қилиш учун Саудия Арабистонига келган ва кейинчалик инсульт ташхиси билан Макка шаҳридаги Ибн Сино касалхонасига даволаниш учун ётқизилган.
Фуқаронинг виза муддати тугаши ва мамлакатдан чиқиб кетишга тақиқ қўйилгани туфайли Ўзбекистонга қайтишга бўлган барча уринишлари муваффақиятсизликка учраган. Шу вақт давомида Ўзбекистоннинг Жидда шаҳридаги Бош консулхонаси унинг оиласига зарур маслаҳат ёрдамини кўрсатган ва дипломатлар Саудия сайёҳлик компанияларидан бири билан биргаликда ватандошни Ўзбекистонга қайтарилишида кўмаклашди.
Барча масалалар ҳал этилгач, 22 август куни беморнинг уйига парвози учун йўл ҳужжатлари расмийлаштирилиб, шифохонадан Жидда халқаро аэропортига зарур тиббий асбоб-ускуналар билан етказилиши таъминланди.
Натижада жорий йилнинг 23 август куни фуқаро ва унинг ўғли шифокор ҳамроҳлигида Тошкентга жўнатилди.
Изоҳ (0)