Жорий йилнинг октябрида Самарқанд вилоятидаги электр тармоқларига хусусий оператор жалб қилиш бўйича тендер эълон қилинади. Бу ҳақда 20 август куни президент Шавкат Мирзиёев ва тадбиркорлар учрашувида маълум қилинган.
Президент матбуот хизмати хабарига кўра, мулоқотда сўнгги йилларда энергетика соҳасида хусусий секторга кенг йўл очиб берилгани айтилган.
“Бу орқали 3,5 миллиард долларлик хусусий шериклик лойиҳалари ишга тушди ва яна 31,5 миллиард долларлик 50 та лойиҳа бўйича ишлар жадал давом этмоқда. Ҳудудий электр тармоқларининг бошқарувини хусусий секторга беришда амалий босқич бошланади. Хусусан, октябрда Самарқанд вилоятидаги электр тармоқларига хусусий оператор жалб қилиш бўйича тендер эълон қилинади. Келгуси йил Жиззах ва Сирдарёда ҳам худди шундай ишлар амалга оширилади”, дейилади манба хабарида.
Жорий йил 10 июль куни сенаторлар янги таҳрирдаги “Электр энергетикаси тўғрисида”ги қонунни маъқуллаганди. Ҳужжатдан ўрин олган масалалардан бири — республикада электр энергиясининг эркин ва рақобатли бозорини ташкил этишдир.
Қонуннинг Сенатдаги муҳокамасида Энергетика бозорини ривожлантириш ва тартибга солиш агентлиги директори Шерзод Хўжаев айрим масалаларга тўхталганди. Хусусан, масъул Ўзбекистонда электр энергияси бозори ташкил этилиб, савдолар онлайн амалга оширилишини айтганди.
“Электр энергиясининг рақобатли улгуржи бозори ташкил этилганда, барча савдо операциялари онлайн платформа орқали амалга оширилади. У ерда шаклланаётган нархлар нафақат бозор учун, балки кенг омма учун ҳам очиқ бўлади. Интернетдаги саҳифа ёки мобил илова орқали онлайн кузатиб боришга имконият яратилади. Бундан ташқари, тартибга солинадиган тарифлар, давлат томонидан белгиланадиган нархларни шакллантириш методологияси ҳам очиқ ва шаффоф бўлади”, деган агентлик раҳбари.
Шерзод Хўжаевнинг қўшимча қилишича, электр энергияси нархларини шакллантиришда корхоналардаги ишлаб чиқариш харажатлари ва рентабеллик даражаси ҳам кенг омма учун очиқланади.
Изоҳ (0)