Қорақалпоғистонда 9,5 млрд долларлик янги лойиҳалар амалга оширилиши кутилмоқда

Қорақалпоғистонда умумий қиймати 9,5 миллиард долларлик янги лойиҳалар амалга оширилиши кутилмоқда. Бу ҳақда Президент матбуот хизмати хабар берди.

Маълум қилинишича, охирги 7 йилда Қорақалпоғистон Республикасида 17 триллион 800 миллиард сўмлик 6 минг 784 та лойиҳа амалга оширилган. Натижада 56 мингта иш ўрни яратилган. Шу даврда 2 миллиард 815 миллион долларлик экспорт қилинган. Бу йил республикада умумий қиймати 874 миллион долларлик 470 та лойиҳа амалга оширилмоқда.

Бу изчил давом эттирилиб, Қорақалпоғистонда хорижий инвестор ва маҳаллий тадбиркорлар томонидан умумий қиймати 9,5 миллиард долларлик 124 та лойиҳа шакллантирилган. Шундан қарийб 1 миллиард 800 миллион долларлик 10 та лойиҳа 19 август куни давлат раҳбарига тақдимот қилинди.

Лойиҳаларга Хитой, Саудия Арабистони, Германия, Россия, Испания каби мамлакатлар компаниялари инвестиция киритмоқда. Улар энергетика, иссиқлик таъминоти, тоғ-кон ва кимё саноати, қурилиш материаллари, хизмат кўрсатиш ва бошқа тармоқларни қамраб олган.

Хусусан, Саудия Арабистони билан ҳамкорликда Нукус шаҳрида марказлашган иссиқлик таъминоти тизимини яхшилаш, Испания инвестицияси иштирокида Қораўзак туманида қуёш ва шамол электр станциялари қуриш, германиялик инвесторлар томонидан Нукус туманида мисни қайта ишлаш ва кабеллар ишлаб чиқариш лойиҳалари режалаштирилган.

Мазкур 124 та лойиҳа натижасида 20 мингдан ортиқ аҳоли иш билан таъминланади.

Президент ишбилармонларга ҳар томонлама мададкор бўлиб, лойиҳаларни жадаллаштириш муҳимлигини таъкидлади.

Бундан аввал давлат раҳбари Nukus Electroapparat қўшма корхонаси фаолияти билан танишгани ҳақида хабар берилганди.  Ўзбекистон президенти Қорақалпоғистонга ташрифи давомида IT ва ижтимоий соҳа объектларини кўздан кечириши, маҳаллаларда аҳоли ҳаёти билан танишиши ҳам режалаштирилган. Янги мажмуалар ишга туширилиб, навбатдаги лойиҳалар бошланади.

Шавкат Мирзиёев ҳудудларнинг ижтимоий-иқтисодий ривожи билан танишиш, халқ билан мулоқот қилиш мақсадида Қорақалпоғистон Республикасига сўнгги марта 2023 йилнинг март ойида борганди. Ташриф давомида янги корхоналар ишга туширилиб, республикада саноатни ривожлантириш йўналишлари белгиланди. Давлат раҳбари, шунингдек, ёшлар билан мулоқот қилди, маҳаллалардаги ишларни кўздан кечирди ҳамда маданий тадбирда иштирок этди.