Ўз оиласи даврасида, юртдошлари билан елкама-елка олға интилаётган ватандошларимиз билан бир қаторда, яқинларидан олисда, хорижда илм ва ривожни мақсад қилиб, ҳар қандай қийинчиликларни енгиб келаётган ўзбекистонликлар ҳам жуда кўп.
“O‘zbekistonlik.Students” лойиҳаси орзу-мақсадлари изидан бориб, чет элда таълим олиб келаётган ёшларимизнинг ҳаётий ҳикояларини улашмоқда. Лойиҳанинг навбатдаги сонида яна 2 нафар шижоатли ўзбекистонлик билан суҳбат ўтказилиши белгиланган.
Жумладан, Самарқандда туғилиб ўсган Моҳинур Раҳматуллаева айни дамда George Washington Law School’да 80 фоизлик стипендия асосида таълим олмоқда. Дастлаб, Буюк Британиядаги Greenwich университетига қабул қилинган Моҳинур пандемия сабабли бир муддат ўқишни Ўзбекистонда давом эттиришига тўғри келган. Бу орада у халқаро ташкилотларда ва фирмаларда амалиёт ўтаб, тажриба оширган. Ниҳоят, 2023 йилдан Моҳинур таълимни яна хорижда давом эттириш имконига эга бўлди.
Педагогика соҳасида ривожланишни мақсад қилган Шуҳрат Тагаев эса Самарқанд давлат жаҳон тиллари институтида бакалавр ва магистр даражасини тугатгач, ҳозирда Columbia University Теаching College’да билим олмоқда. У шунчаки “Америка орзуси” билан эмас, таълим соҳасида ўз сўзи ва ўз услубига эга мутахассисга айланишдек мақсадни кўзлаб АҚШга йўл олганлардан.
Uzbekistan’s Club лойиҳаси мана шундай ёшларнинг ютуқлари, улар енгиб ўтаётган машаққатлар, улар интилаётган натижалар бошқаларга ҳам куч ва мотивация бериши учун кенг оммага тақдим этиб келинмоқда.
Ҳозирда лойиҳа Ёшлар ишлари агентлиги томонидан қўллаб-қувватланади. Ucell алоқа компанияси, Chevrolet ва Uzbekistan Airways миллий авиаташувчиси эса лойиҳанинг асосий ҳамкорлари ҳисобланади.
Изоҳ (0)