Қозоғистонда Афғонистонда ишлаб чиқарилган айрим анорли газланган ичимликлар тақиқланиши мумкин. Бу ҳақда Tengrinews хабар берди.
![](/static/2024/08/16/photo_2024-08-16_08-18-11--HIM8Feu.jpg)
Соғлиқни сақлаш вазирлиги Санитария-эпидемиологик назорат қўмитасининг маълумотига кўра, афғон газли ичимлигининг талабларга мувофиқлиги лабораторияда текширилади.
“Ҳозирда қўмита ҳудудий бўлинмалари турли номдаги (Афғонистонда ишлаб чиқарилган) анорли газланган ичимликларни савдо объектларидан назорат тариқасида сотиб олмоқда ва кейинчалик уларни лаборатория экспертизасидан ўтказмоқда”, дейилади қўмита хабарида.
Назорат хариди натижаларига кўра, ичимлик таркибидаги бўёқлар рухсат этилган меъёрдан ортиқ бўлган тақдирда маҳсулотни сотувдан қайтариб олиш ва чақириб олиш каби тезкор чоралар кўрилади.
- Қозоғистонда июль ойида Royal, Paradise, Маni, Pure, “Золотая жизн” (“Олтин ҳаёт”) анор таъмига эга алкоголсиз газланган ичимликлар синовдан ўтказилганди. Бунга Қирғизистонда “Золотая жизн” ичимлигини сотишни тақиқлаш ва Ўзбекистонда санитария текширувлари сабаб бўлган.
Ўзбекистонда сотилаётган Афғонистон анорли ичимлиги сифат талабларига жавоб бермайди
Июль ойида мамлакатда сотилаётган Афғонистоннинг анорли газланган ичимлиги сифат талабларига жавоб бермаслиги аниқланди. Бу ҳақда Техник жиҳатдан тартибга солиш соҳасида назорат инспекцияси “Дарё”га маълум қилди.
Бозорлар ва савдо расталарида сотилаётган Royal савдо белгиси остидаги анор шарбати маҳсулоти техник жиҳатдан тартибга солиш соҳасидаги меъёрий ҳужжатлар талабига қай даражада мос келиши ўрганилган.
Натижаларга кўра, Royal савдо белгиси остидаги анор шарбати маҳсулоти тамғаланиши (маркировка) бўйича УзТР.490-022:2017 “Озиқ-овқат маҳсулотларини тамғалаш юзасидан унинг хавфсизлиги тўғрисидаги умумий техник регламент”ининг 8, 36, 53 ва 58-бандлари талабларига номувофиқлиги аниқланган.
Аккредитланган синов лабораториясининг хулосасига кўра, Royal маҳсулоти таркибида “Азорубин, E 122” моддаси белгиланган меъёрдан ортиқ. Шу сабабли ичимлик қадоғида “Таркибида ранг берувчи (ранг берувчилар) мавжуд, улар болаларнинг фаоллигига ва диққатига салбий таъсир кўрсатиши мумкин” деган огоҳлантирувчи ёзув ёзилиши керак.
Изоҳ (0)