Сиёсатшунос Ойбек Сирожов “Дарё” билан суҳбат давомида бугун дунёда конфронтация жараёни кучайиб, янги чақириқлар янграётгани, бунинг натижасида денгиз йўлларидан фойдаланиш масаласи чекланиб, унга муқобил бўлган қуруқлик йўлларига эътибор ошиб бораётгани ҳақида гапириб ўтди.
Унинг фикрича, Хитойни Европа билан боғлайдиган қуруқлик йўлларининг асосий қисми Марказий Осиёдан ўтади. Шу сабабли 5 та давлат умумий стратегия ишлаб чиқиши зарур.
“Европага ўтувчи қуруқлик йўлларининг асосий қисми Марказий Осиёдан ўтади. Фақат бу ердаги муаммо минтақа давлатларининг бу масалада умумий позицияда эмаслигида. Шунинг учун 5 мамлакат умумий стратегия ишлаб чиқиши керак. Ва бу қарорни глобал ўйинчилар олдига қўя олиш зарур. Мана бу бизга кўпроқ самара беради”, деди Ойбек Сирожов.
Шунингдек, сиёсатшунос Хитойнинг “Бир макон, бир йўл” лойиҳаси Марказий Осиё давлатларини бирлаштириш учун эмас, балки бўлиб ташлаш учун хизмат қилишини қўшимча қилди.
Масалан, Хитойнинг “Бир макон, бир йўл” лойиҳасини олайлик. Бу лойиҳа минтақани бирлаштириш учун хизмат қилмайди. Чунки Хитой Қозоғистон, Қирғизистон, Тожикистон ва Афғонистон орқали алоҳида-алоҳида йўл шакллантирмоқда, Хитой нима учун шундай қилмоқда? Бу орқали Хитой бир мунча вақт ўтиб минтақа давлатларини бўлиб ташлаш имкониятига эга бўлади! Яъни Хитой истаса, юкларини Қозоғистон орқали, хоҳласа, Ўзбекистон орқали Европага ташийди. Асосий ричаг Хитойнинг қўлида бўлади. Агар минтақа давлатларининг бу борада ягона концепцияси бўлса, Хитой бундай ўйин қила олмайди, деган Сирожов.
Маълумот ўрнида, жорий йилнинг август ойида Хитой—Қирғизистон—Ўзбекистон темирйўлини ишга тушириш маросими бўлиб ўтиши кутилмоқда. Ушбу битимни амалга ошириш бўйича ҳамкорлик тўғрисидаги битим 6 июнь куни Пекинда уч давлат ҳукуматлари ўртасида имзоланган эди.
Изоҳ (0)