“Қўрғон сирлари”дан кейин нима томоша қилса бўлади: экран қаршисига михлаб қўядиган ажойиб турк сериаллари

Сўнгги йиллардаги ёрқин турк сериалининг иккинчи фасли — “Қўрғон сирлари” ниҳоясига етди. Лойиҳанинг келажакдаги тақдири ҳақидаги янгиликларни кутиш билан бирга ундан қолишмайдиган даражада қизиқарли бўлган қуйидаги сериалларни тавсия қиламиз.

“Сохта муҳаббат”

Сериалда “Нафратдан севгигача...” формуласидан фойдаланилади. “Қўрғон сирлари” мухлислари учун ёқимли хабар: роллардан бирини бош қаҳрамон Сейраннинг опаси роли билан танилган Берил Позам ижро этади. Сериалда йирик тўқимачилик компанияси ходими Айше (Буржу Ўзберк) ҳақида ҳикоя қилинади. Отасининг ўлимидан сўнг, қиз онаси ва уни севмаган одамига турмушга бериш ниятида бўлган қаттиққўл акалари билан яшайди. Айше бундай ҳаётга чидашни истамай, тақдирини ўз қўлига олади ва тикувчилик фирмаси меросхўри Керемга (Чағлар Эртуғрул) сохта никоҳ тузишни таклиф қилади.

“Дилемма”

Тобора оммалашиб бораётган детектив психотриллер Американинг машҳур “Тонгги шоу” услубида суратга олинган. Сериалда бош ролни “Муҳташам юз йил” фильми юлдузи Бергузар Корел, иккинчи даражали роллардан бирини томошабинларга “Қўрғон сирлари”даги Сейраннинг отаси роли билан таниш бўлган Дирен Пўлатоғуллари ижро этади. Машҳур телебошловчи Неслиҳан Турхон жонли эфирда жиноятларни тергов қилмоқда. Журналист ўзининг муросасиз, холис ва адолатпарварлиги учун қадрланади. Аммо бир куни унинг обрўсига путур етади — ягона ўғли Жан (Каан Мирач Сезен) бир талабани ўлдиришда гумон қилинади. Неслиҳан олдида қийин вазифа турибди — у учун нима муҳимроқ эканлигини ҳал қилиш: бурчми ёки оила.

“Бегоналар сирлари”

Сериал воқеалари юқори жамият вакиллари, уларнинг қариндошлари ва хизматкорлари яшайдиган Истанбулнинг чекка ҳудудида бўлиб ўтади. Машҳур шифокор оиласида хизматкор бўлиб ишлаган Меремнинг тўсатдан вафот этиши ҳаммани ларзага солади. Сирли ўлим сабабларига ҳали ойдинлик киритилмаган. Ўлим тафсилотини очиш учун журналист Қаҳраман Демир ишга аралашади, аммо хизматкорлар бу воқеадан четда қолишни маъқул кўришади, чунки улар хўжайинларининг бошқа сирларини ҳам билишади.

“Янги ҳаёт”

Бахтсиз ҳодиса сабаб махсус кучлар аскари Адем (Серкан Чайўғлу) ҳарбий хизматдан кетишга мажбур бўлади. Энди у оиласини боқиш учун зудлик билан бирор жойда иш топиши керак. Тўсатдан у учун яхши таклиф чиқади: машҳур олигархнинг хотинини ҳимоя қилиши керак. Гўзал Ясмин (Мелиса Асли Памук) янги тансоқчисидан унчалик мамнун эмас. Иккаласи ҳам бу учрашув уларнинг ҳаётини бутунлай ўзгартиришини ҳали билмайди.

“Қоғоз уй”

Ҳелин Жандемир, Нур Феттаҳўғлу ва Эрдал Бешикчиўғлу иштирок этган биргина хато бир неча кишининг тақдирини қандай бузиши ҳақида шафқатсиз драма. Инжиқ Жемре — дадасининг эрка қизи. 16 ёшли мактаб ўқувчиси учун ҳамма нарса муҳайё. Бироқ бир кунда қизнинг отаси ҳақидаги фикри бутунлай ўзгариб кетади. Телефон суҳбатидан маълум бўлишича, отаси онасига хиёнат қиляпти. Уйидаги хизматкор аёлни отасининг маъшуқаси деб ўйлаган Жемре оғир жиноятга қўл уради. Тажрибали адвокат ҳисобланган ота-онаси ҳар қандай ҳолатда ҳам қизи қамалмаслигига ҳаракат қилади.

“Ешилчам”

“Қўрғон сирлари” юлдузи Афра Сарачоғлу иштирок этган муҳаббат ҳақидаги сериал. Истанбул, 1960 йиллар. Ёш ва амбицияли продюсер Семиҳ Атеш (Чағатай Улусой) бизнес шеригининг хиёнати туфайли машҳур Yeşilçam киностудиясида ишидан айрилади. Карьерасини сақлаб қолиш учун Атешнинг биргина йўли бор: ҳеч кимникига ўхшамаган блокбастер суратга олиши керак. Шунингдек, тан олиниши ва муваффақиятга эришиши учун қаҳрамон кино саноатида тўлиб-тошган кўплаб тузоқларни енгиши керак бўлади.

“Биринчи ва охирги”

Бутун бир оиланинг аламли парчаланиши ҳақидаги аччиқ ҳикоя. Дениз (Ўзге Ўзпиринчи) ва Бариш (Салиҳ Бадемчи) 10 йилдан бери бирга яшайди, лекин энди улар бахтни ҳис қилишмайди. Чексиз жанжаллар, танбеҳлар ва бир-бирларини эшита олмаслик эр-хотинларнинг ажрашиш учун ариза беришларига олиб келади. Бу қарор уларнинг ёш ўғлига ёмон таъсир кўрсатади. Қаҳрамонлар васийлик масалалари ҳақида баҳслашаётган бир пайтда томошабинлар собиқ жуфтликнинг муносабатлари тарихини томоша қилишади: ёрқин танишувдан тортиб ҳамма нарса парчалана бошлаган фожиали дақиқагача.

“Бонкис”

Ҳар қандай вазиятда ҳам ўзига ишониш ҳақидаги ҳаётий комедия. Муваффақиятсиз муносабатлардан сўнг, Денис (Дениз Тезуйсал) ўзига вақт ажратишга қарор қилади. У архитектура бюросидаги ишидан кетади ва ўз кафесини очади. Тўғри, иши бирданига юришиб кетмайди. “Бонкис”нинг бир нечта мижозлари деярли ҳеч қандай даромад келтирмайди, бундан ташқари, Дениснинг ота-онаси унинг бизнесига жиддий қарашмайди. Муваффақиятсизлик кетидан муваффақиятсизлик қизни таъқиб қилади, лекин у орзуси билан хайрлашишни истамайди.