Ижтимоий тармоқларда гўшт нархи ошиши ҳақида хабарлар тарқалди. Иқтисодчи Отабек Бакиров ўзининг Twitter’даги саҳифасида “Қирғизистон ва Қозоғистондан мол келиши қисқариб, сўйишга мол камайипти. Гўшт нархи ошади деяпти қассоблар”, дея пост қолдирган. Бошқа фойдаланувчилар эса қўй гўшти аллақачон 120-125 минг сўм бўлганини ёзган.
Ветеринария ва чорвачиликни ривожлантириш қўмитаси матбуот хизматининг “Дарё”га мазкур масала юзасидан берган изоҳида ўрганишлар давомида ижтимоий тармоқлардаги хабарлар мутлақо асоссиз эканлигини маълум қилди.
Қўмита берган маълумотга кўра, айни кунларда пойтахт кушхоналарида 1 кг қорамол гўшти сифатига қараб ўртача 65 минг сўмдан 78 минг сўмгача, 1 кг қўй гўшти эса ўртача 72 минг сўмдан 85 минг сўмгача сотилмоқда.
Албатта бу кушхоналардаги улгуржи нархлар. Хўп, бозорда қанча, одамлар қўлига гўшт қанчадан етиб бормоқда? Шу каби саволларга жавоб топиш мақсадида “Дарё” мухбири Тошкент шаҳридаги “Чорсу” деҳқон бозорида бўлиб, қассоблар ва харидорлар фикрини ўрганди.
Суҳбат давомида қассоблар қорамол камлиги боис гўшт нархи 5-10 минг сўмга ошганини айтди.
Бозор масъулларининг таъкидлашича, Покистон, Беларусь ҳамда Қозоғистондан келтирилаётган арзон гўштлар (1 килограмм мол гўшти ўртача 60 минг сўмдан, қўй гўшти эса 65 минг сўмдан) сотиладиган расталар ташкил қилинган ва унга талаб ортиб бормоқда.
Харидорлар билан қассобларнинг фикри айро: нархлар ўртагача 20-30 минг сўм атрофида қимматлаган.
Иқлимшунос олим Эркин Абулаҳатовнинг ёзишича, Эль-Ниньо таъсирида яйловларда чорвадорлар учун жуда қулай йил бўлишига қарамай, йирик ва кичик чорвадорларда чорвани ўтлатишда, яйловларга киришда муаммолар борлиги уларнинг “кайфиятида” ҳам кўринган.
“Аслида бизда жорий йилдаги гўшт нархларидаги бу мувозанат ижобий ҳисобланиб, келгуси икки йилдаги Ла-Ниньо эффекти куз—қишда камёғин ва яйловларда яшиллик қопламасининг камайиши чорва гўшти нархларини тўсатдан юқори кўтарилишини таъминлайди.
Йилдан йилга ем-хашак маҳсулотларида турлича баланс, яйловларда чорва молларини боқишдаги бир оз муаммоли вазиятлар чорвадорларнинг чорвани кўпайтиришдаги “кайфиятини” сўндирмоқда.
Масъул тузилмалар ўзбек чорвачилик масалаларини мувозанатлашда “пастдан юқорига” тамойили асосида ҳудудларда чорва молларини кўпайтиришда илмий асосланган турлича усулларга мурожаат этиши ҳамда аҳоли орасида буни кенг тарғибот қилиш ишларига куч бериши керак.
Эркин Абулаҳатов, иқлимшунос олим
Ветеринария ва чорвачиликни ривожлантириш қўмитасининг тақдим этган маълумотида келтирилишича, мамлакатимизда қорамоллар сони 14,5 млн бошга, ўтган йилга нисбатан 435 минг бошга, қўй-эчкилар 24,1 млн бошга, ўтган йилга нисбатан 500 минг бошга кўпайган.
Аҳоли жон бошига гўшт ва гўшт маҳсулотлари медицина меъёрига нисбатан 112 фоизга ошган.
Изоҳ (0)