Исроил армияси Ливан пойтахти Байрутга ҳужум уюштириб, Голан тепаликларидаги Маждал Шамс қишлоғида болалар ва тинч аҳоли ўлимида айбдор деб топилган “Ҳизбуллоҳ” қўмондонларидан бирини нишонга олганини эълон қилди.
Авиазарба Ливан пойтахтининг жанубий чеккасига қаратилган. Reuters манбасига кўра, гап Ҳизбуллоҳнинг юқори мартабали қўмондони ҳақида кетмоқда, унинг тақдири номаълум. Тимес оф Исреал нашрининг ёзишича, армия зарбаси гуруҳ раҳбари Ҳасан Насруллоҳнинг катта маслаҳатчиси Ҳаж Моҳсин номи билан танилган Фуад Шукрга қаратилган. Исроил мудофаа кучлари уни “Ҳизбуллоҳ” учун аниқ ракеталар яратиш лойиҳасининг раҳбари деб атаган.
27 июль куни Голан тепаликларида жойлашган Маждал Шамс қишлоғига уюштирилган ракета ҳужуми оқибатида 11 нафар исроиллик бола ҳалок бўлган, ўнлаб одамлар жароҳатланган эди. Исроил ҳужум ортида “Ҳизбуллоҳ” гуруҳини айблаган. Гуруҳ ҳужумга алоқадорлигини тан олмаган, бироқ Маждал Шамсга қилинган ҳужумдан бир соат олдин “Ҳизбуллоҳ” Исроилнинг Ливан жанубидаги аҳоли пунктларини ўққа тутганига жавобан ракета ҳужуми уюштирганини маълум қилган.
Ливан расмийлари Маждал Шамснинг ўққа тутилишини қоралаган.
Ливан ҳукумати ҳар қандай тинч аҳолига қарши зўравонлик ва ҳужумларни қоралайди ҳамда барча жабҳаларда ҳарбий ҳаракатларни зудлик билан тўхтатишга чақиради, дейилади Байрут баёнотида.
Изоҳ (0)