Самарқандда хорижга ишга юборишини айтиб 50 га яқин кишини чув туширган шахс ушланди

Самарқанд вилоятининг Оқдарё туманида хорижга ишга юборишини айтиб 49 кишидан пул олган шахс ушланди.

Бош прокуратура ҳузуридаги департаментнинг Оқдарё туман бўлими ва ИИБ ходимлари ҳамкорлигида ўтказилган тезкор тадбирда фуқаро V.И. фуқаролар Э.Х. ва Б.Б.нинг ишончига кириб, уларни Англия давлатига ишга юбориши эвазига 4 500 долларни фирибгарлик йўли билан қўлга киритиб, тадбир давомида 1,2 миллион сўм ва 700 долларни қайтариб берган вақтида ашёвий далиллар билан ушланган.

Шунингдек, терговга қадар текширув давомида у 47 нафар фуқарони юқоридаги каби алдаб, чет давлатларга ишга юбориши эвазига жами 37 160 долларни фирибгарлик йўли билан қўлга киритгани аниқланган.

Департаментнинг Навоий вилояти бошқармаси, ДХХ ва ИИБ ходимлари ҳамкорлигида ўтказилган тезкор тадбирда эса фуқаро Р.Д. фуқаро А.Ф.нинг ишончига кириб, уни Кореяга яшаш ва ишлаш учун жўнатиши ҳамда виза ҳужжатларини тайёрлаб бериши эвазига фирибгарлик йўли билан тўрт минг долларни олган вақтида ашёвий далиллар билан ушланган.

Мазкур ҳолатлар юзасидан Жиноят кодексининг 168-моддаси (фирибгарлик) билан жиноят ишлари қўзғатилиб, тергов ҳаракатлари ўтказилмоқда.