Исроил босиб олинган Голан тепаликларидаги стадион ўққа тутилиши ортидан Ливанни “вайронкор уруш” хавфидан огоҳлантирди. Бу ҳақда Исроил Ташқи ишлар вазирлиги спикери Орен Марморштейн хабар берди.
Яҳудий амалдорига кўра, урушдан қочишнинг шарти “Ҳизбуллоҳ” кучларини қуролсизлантириш ва олиб чиқишдир. У Голан тепаликларидаги ҳужум учун масъулиятни “Ҳизбуллоҳ” зиммасига юклади. Спикер стадионга келиб тушган ракета Эронники бўлганини даъво қилди.
“Исроил ўзини ҳимоя қилиш, ҳужумга жавоб қайтариш ҳуқуқи ва масъулиятидан фойдаланади”, деди Марморштейн.
У Эрон ва у томонидан қўллаб-қувватлаётган гуруҳлар — “Ҳизбуллоҳ”, ҲАМАС ва ҳусийларга тўлиқ масъулиятни юклашга, шунингдек, Эрон инқилоби қўриқчилари корпусини “террористик ташкилот” деб тан олиб, санкциялар қўллашга чақирди.
“Дунё Ливан учун ҳам ҳалокатли бўладиган кенг кўламли уруш олдини олишининг ягона йўли “Ҳизбуллоҳ”ни Хавфсизлик кенгашининг 1701-резолюциясига (қуролсизланиш ва кучларни олиб чиқиш бўйича) риоя қилишга мажбурлашдир. Ҳозир буни дипломатик йўл билан амалга оширишнинг сўнгги лаҳзаси”, деди яҳудий давлати расмийси.
Изоҳ (0)