Ўзбекистон Марказий Осиё давлатлари ичида масъулиятли сунъий интеллект (SI) бўйича етакчи ўринни эгаллади. Тегишли рейтинг The Global Center on AI Governance томонидан эълон қилинди.
Тадқиқотда иштирок этган 138 та давлат орасида Ўзбекистон 11,27 балл билан жаҳонда 70-ўринни эгаллаган. Президентнинг сунъий интеллектни ривожлантиришга қаратилган учта фармони билан мамлакатнинг муваффақияти мустаҳкамлангани маълум қилинган. Ушбу фармонлар маданий ва лингвистик хилма-хиллик, халқаро ҳамкорлик, давлат сектори кўникмаларини ривожлантириш, рақобат органлари ва шаффофлик каби асосий йўналишларни қамраб олган. Қўшни республикаларнинг рейтингдаги кўрсаткичлари қуйидагича:
GIRAI масъулиятли сунъий интеллектни (SI) учта асосий ўлчов бўйича 19 та тематик йўналишда баҳолайди: инсон ҳуқуқлари ва SI (кўк), масъулиятли SI бошқаруви (қизил) ҳамда масъулиятли сунъий интеллект имкониятлари (сариқ рангда).
16 та минтақавий марказлар, шу жумладан, Шарқий Европа ва Марказий Осиё учун ахборот эркинлигини ривожлантириш институти (IDFI) билан ҳамкорликни ўз ичига олган тадқиқотда ҳар бир мамлакат ҳукумат тузилмалари, ҳаракатлари ва нодавлат ташаббуслари асосида баҳоланади.
Қозоғистон рейтингда 74-ўринни эгаллаган, у минтақада Ўзбекистондан кейинги ўринда туради. Мамлакат SI билан боғлиқ ҳукумат ташаббусларида етакчилик қилмоқда, жумладан, 2022 йил июль ойида ишга туширилган gig иқтисодиёти ишчиларини ижтимоий ҳимоя қилиш бўйича эътиборга молик лойиҳа.
Қирғизистон 7,4 балл билан минтақада учинчи ўринни эгаллаб, масъулиятли SI’да нодавлат секторнинг сезиларли иштирокини намойиш этди. Бироқ, кенг қамровли ҳукумат тизимининг йўқлиги унинг умумий натижасига таъсир қилди.
Тожикистон 2040 йилгача ривожланишни мақсад қилган SI миллий стратегиясига эга ягона Марказий Осиё давлатидир. Масъулиятли сунъий интеллектни бошқариш соҳасида яхши натижаларга эришган бўлса-да, унинг нодавлат сектори фаолияти чекланган.
Минтақа давлатлари орасида энг паст кўрсаткични – 1,98 балл билан Туркманистон қайд этган, глобал рейтингда эса 111-ўринда. Мамлакатда масъулиятли SI учун муҳим ҳукумат тузилмалари йўқ ва нодавлат секторнинг минимал иштироки мавжуд, бу эса масъулиятли SI имкониятлари бўйича ноль баллга олиб келади.
Изоҳ (0)