Гастроэнтеролог тавсияси: иштаҳани очувчи ва тўйимли бўлмаган маҳсулот турлари

Барчамизга маълумки, нотўғри овқатланиш ва тартибли рационга амал қилмаслик ортиқча вазн билан боғлиқ муаммоларни келтириб чиқаради. Шу сабабли озғин ва соғлом танага эга бўлиш учун фойдали  бўлган маҳсулотларни истеъмол қиламиз. Аммо шундай озиқ-овқатлар борки, улар нафақат очлик ҳиссини кучайтиради, балки кун сайин иштаҳани ошириб боради. Бу борада шифокор гастроэнтеролог Людмила Сонина қандай маҳсулотларни четлаб ўтиш бўйича ўз тавсияларини берди.

Иштаҳа кўтарувчи озиқ-овқатлар одатда оғиз бўшлиғининг ўзидаёқ тез парчалана ва ҳазм бўла бошлайди, сўнг танани қисқа муддатда тарк этади. Бунинг натижасида биз меъёридан кўпроқ овқат тановул қиламиз.

Кислота даражаси юқори бўлган маҳсулотлар

Таркибида кислота даражаси юқори бўлган озиқ-овқатлар ошқозон шиллиқ қаватида меъда ширасининг кўпроқ ишлаб чиқарилишига сабаб бўлади ва натижада очлик ҳисси тез пайдо бўлади. Бундай маҳсулотларга нордон олма, лимон, апелсин, тузланган карам, тузланган бодринг кабилар киради. Уларни асосий овқат сифатида истеъмол қилиш ярамайди, аммо газак учун ёки таомга қўшимча маҳсулот сифатида фойдаланиш мумкин.

Зираворлар ва соуслар

Шубҳасиз туз ва бошқа зираворлар қўшилмаган таом хуштаъм бўлмайди, аммо зиравор ва тузлардан фойдаланишда меъёрни унутмаслик лозим. Чунки уларда глютамат натрий бўлиб, бу модда иштаҳани 40% га оширади.

Ширинликлар

Ширинликларнинг зарари ҳақида кўп эшитганмиз. Улар ошқозон-ичак тракти, тери саломатлиги, эмоционал ҳолат ва бошқа кўплаб жабҳаларга таъсир кўрсатади. Шу жумладан иштаҳани оширувчи энг кенг тарқалган маҳсулот ҳам ҳисобланади. Шакар қондаги глюкоза даражасини кескин кўпайтиради, сўнг бу кўрсаткич тезда тушади. Шу сабабли организм яна энергия — қўшимча озуқа талаб қилади.

Мевали шарбатлар

Мева шарбатлари метаболизмни тезлаштиргани туфайли иштаҳани оширувчи ичимликлар ҳисобланади. Бундан ташқари, шарбатлар қондаги шакар даражасини ҳам кўпайтиради. Янги сиқилган мевалардан тайёрланган шарбатни сув билан қўшиб ичиш тавсия этилади.

Нон маҳсулотлари

Ун ўзида деярли ҳеч қандай фойдали хусусиятни сақламайди. Нон маҳсулотлари бизга оддий углеводлар ва ортиқча калориялар ёрдамида тўйиниш ҳиссини беради. Нон ёки булочка истеъмол қилгандан сўнг очлик ҳисси тезда қайтади. Экспертлар уннинг юқори навларидан тайёрланган макарон истеъмолини камайтириш ва буғдойдан тайёрланган маҳсулотларни сабзавот ва оқсиллар билан бирга ейиш тавсия этилади.