2023 йилда дунёдаги оч одамлар сони тахминан 733 миллионни ташкил этди, бу Ер юзидаги ҳар 11-инсон очликдан азият чекканини англатади. Африка қитъасидаги ҳар бешинчи одам оч қолган.
Бундай хулосалар Озиқ-овқат ва қишлоқ хўжалиги ташкилоти (FAO) ва БМТнинг бошқа гуманитар ихтисослашган агентликларининг “Дунёда озиқ-овқат хавфсизлиги ва озиқланиш ҳолати” (SOFI) йиллик ҳисоботида келтирилган.
Ҳисоботда айтилишича, глобал инқироз чуқурлашар экан, оч қолганлар сони кетма-кет уч йил давомида юқорилигича қолмоқда. Шунингдек, дунё бу борада 15 йил орқага чекингани, тўйиб овқатланмаслик даражаси 2008—2009 йиллардаги даражага қайтгани айтилади.
Бундан ташқари, 2019 йилдан бери тўйиб овқатланмайдиганлар сони қарийб 152 миллионга кўпайган.
2023 йилда дунё бўйлаб 2,33 миллиардга яқин одам ўртача ёки оғир даражада озиқ-овқат таъминотидан азият чекди, бу кўрсаткич 2020 йилда COVID-19 пандемияси даврида кескин ўсишдан кейин деярли ўзгармади. Африкада аҳолининг ярмидан кўпи (58 фоиз) ўртача ёки оғир даражада озиқ-овқат таъминоти етишмаслиги шароитида яшайди.
Дунёда соғлом овқатланиш билан боғлиқ муаммолар сақланиб қолмоқда. 2022 йилда 2,8 миллиарддан ортиқ одам соғлом озиқ-овқат сотиб ололмади. Кам даромадли мамлакатларда аҳолининг 71,5 фоизи соғлом озиқ-овқат маҳсулотларига эга эмас, юқори даромадли мамлакатларда эса бу кўрсаткич 6,3 фоизни ташкил этади.
Изоҳ (0)