Атлантика океанини қайиқда сузиб ўтишга уринган эр-хотин Канада қирғоқлари яқинида ўлик ҳолда топилди. Бу ҳақда CNN нашри хабар берди.
Манбада айтилишича, британиялик жуфтлик 11 июнь куни Янги Шотландиянинг Галифакс бандаргоҳидан Канада томонга сузиб кетган. Улар оддий қайиқда улкан уммонни кесиб ўтишни мақсад қилишган.
70 ёшли Бретт Клиббери ва унинг рафиқаси 60 ёшли Сара Паквуд Theros номли кемада саёҳатга чиқишган. 10 июль куни эса Канада полицияси Сабле ороли яқинида уларнинг жасадларини топган.
Жуфтликнинг океанда изсиз йўқолгани ҳақида 18 июнь куни хабар берилган. Шундан сўнг Атлантика атрофидаги мамлакатлар денгиз патрул кучлари уларни излашга тушган.
Жуфтликнинг жасади Сабле ороли яқинидаги кемалар ҳалокати кўп учрайдиган ҳудуддан топилган. Ушбу ҳудуд “Атлантика қабристони” деб номланиб, у ерда 1583 йилдан бери 350 дан ортиқ кема ҳалокати қайд этилган.
Клиббери ва Паквуд ўзларини саргузашт саёҳатчилари сифатида тасвирлаб, Theros Adventures номли YouTube каналида саёҳатлари ҳақида ҳикоя қилувчи видеоларни жойлаштириб келган.
Жуфтлик саёҳатни моторли қайиқда бошлашган. Қайиқ унга ўрнатилган қуёш панелларидан қувват олган. Канада соҳилларида уларнинг жасадлари бошқа бир фавқулодда вазиятлар учун мўлжалланган резина қайиқда топилган. Ўлим сабаблари аниқланмаган.
Изоҳ (0)