Версал ва Букингем саройлари Саудия қироллик оиласининг ҳашаматли қасрлари олдида оддий бинодек кўринади. Яқин қариндошлари 2000 кишидан ортиқ бўлган энг бадавлат қироллик сулоласи дунё бўйлаб юзлаб ажойиб кўчмас мулкларга эга. Ар-Риёднинг тилло саройлари ва саҳрода қурилган 195 миллион долларлик мажмуадан тортиб, Лондондаги миллиардерлар уйлар қаторидаги ўнлаб қасрлар шулар жумласидандир. Бугунги мақолада дунёдаги энг қимматбаҳо кўчмас мулкларга эга Саудия қироллиги бинолари ҳақида сўзлашамиз.
Саудия Арабистони подшоҳи Салмон ибн Абдулазиз Ал-Сауд
Замонавий Саудия Арабистони Қироллиги 1932 йилда қирол Абдулазиз Ал-Сауд томонидан ташкил этилган. Нефтьга бой бу давлат бир асрдан камроқ вақт ичида сулола томонидан бошқарилиб, дунёдаги глобал мамлакатлардан бирига айланган. Салмон ибн Абдулазиз Ал-Сауд 2015 йил 23 январдан бери давлат бошлиғи сифатида ишлаб келмоқда. У давлат асосчиси Салмоннинг 25-ўғли бўлиб, унинг ихтиёрида бир нечта саройлар бор. Уларнинг 1,4 триллион долларга баҳолангани эса кўпчилик учун ажабланарли эмас.
Ал-Ямама саройи, Ар-Риёд, Саудия Арабистони
Ал-Ямама саройи Саудия Арабистони пойтахти Ар-Риёдда жойлашган. У қиролликнинг расмий қароргоҳидир ва штаб-квартираси сифатида хизмат қилади. Саройнинг узунлиги 370 минг метр квадрат бўлиб, 1000 дан ортиқ хонаси бор. Ушбу қароргоҳ 1983 йилда қурилган. Унинг атрофида бир нечта бассейн, масжид ва кинотеатрлар ҳам мавжуд. Нафис, замонавий геометрик нақшлар ва қиррали деразалари билан анъанавий Нажд меъморчилигига ўхшайди. Саройда ҳайратланарли қандиллар, чиройли гиламлар, ноодатий декоратив буюмлар ва олтин билан безалган нақшлар мавжуд.
Италиядан келтирилган мармар поллар ва зарҳал деворлар ва дабдабали устунлари билан ҳам сарой ажралиб туради. Қирол Салмон бинода ҳукумат йиғилишлари ва хориждан келган нуфузли меҳмонларни шу ерда кутиб олади. Президентлар билан учрашувлар ажойиб оқ гиламлар, бежирим тикилган парда, зарҳал деворли бинода бўлиб ўтади.
Эрга саройи, Ар-Риёд, Саудия Арабистони
Қирол Салмон шунчалик бойки, меҳмонларни қабул қиладиган саройлари талайгина. Ар-Риёд марказига яқин ҳамда яқинда қуриб битказилган Эрга саройи шулардан биридир. Палма дарахтлари, фаввораларга тўла бу сарой расмий қароргоҳдан кам эмас. 2015 йилда қирол бўлганига унчалик кўп бўлмаган Салмон АҚШнинг ўша вақтдаги президенти Барак Обамани қабул қилган. Америка президенти марҳум қирол Абдулла ибн Абдулазис Ал-Сауднинг вафоти муносабати билан ҳамдардлик билдирган.
Саройнинг расмий хоналаридан бирида ҳаттоки чиқинди қутиси ҳам кумушдан ясалганига эътибор беринг. Эрга саройидан асосан ҳукумат вазифалари, давлат қабуллари, турли давлатлардан келган хорижий меҳмонлар билан учрашувлар ўтказиш мақсадида фойдаланилади. Бундан ташқари, мажмуада Саудия санъати ва урф-одатларини халқаро миқёсда ёйиш мақсадида фестиваллар ҳам ўтказилади.
Мурабба саройи, Ар-Риёд, Саудия Арабистони
32 хонадан иборат бўлган Мурабба саройи 1945 йилда қурилган. Ҳозирда ундан қирол оиласининг асосий қароргоҳи сифатида фойдаланилади. Бино жамоатчилик учун ҳам очиқ. Сарой Наждий усулида қурилган бўлиб, кўплаб қадимий архитектура ва дизайнларини ўзида мужассам этган.
Сарой икки қаватдан иборат бўлиб, меҳмонларни қабул қиладиган хоналар ва қироллик оила аъзолари хоналарига бўлинади. Расмда саройнинг марказий ҳовлиси бўлиб, у оқ рангда. 1990 йилларда сарой ва унинг атрофида йирик қайта қуриш лойиҳаси амалга оширилган. Уста Ибн Ғазо томонидан қурилиш ҳолати сақланиб қолинган ҳамда маҳаллий материаллардан фойдаланилган. Мажмуада зиёфат хоналари ҳам бўлиб, у мармар устунлар ва ранг-баранг форс гиламлари безатилган.
Йиллар давомида саройга кўплаб таниқли инсонлар ташриф буюрган. 2017 йили май ойида ташриф буюрган Дональд Трамп қиличбозлик рақсидан завқланган. Бир неча йиллар олдин эса президент Жорж Буш саройга айланган музей бўйлаб саёҳат қилган.
Шаҳзода Муҳаммад ибн Салмон Ал-Сауд
Қирол Салмоннинг еттинчи ўғли ва тахт вориси шаҳзода Муҳаммад 2022 йилдан бери бош вазир бўлиб ишлайди, унинг бир нечта саройларидан ташқари 500 миллион долларлик яхтаси ҳам бор. Шаҳзода бундан ташқари дунё бўйлаб ҳам саёҳат қилишни яхши кўради. Унинг Европадаги уйлари дунёдаги энг қимматбаҳо кўчмас мулклар сирасига киради.
Франциядаги Chateau Louis XIV саройи
Францияда Лувесен шаҳрида жойлашган, Версалдан унчалик узоқ бўлмаган бу бино 17-асрга тегишли француз анъаналарига мос равишда қурилган. New York Times журналистларининг маълумотларига кўра, шаҳзода қалъага ўхшаш мазкур бино учун 2015 йилда 300 миллион доллар сарфлаган.
Парижнинг ғарбий чеккасида жойлашган уй дунёнинг энг қиммат уйларидан ҳисобланади. 57 гектарлик майдонли бинода олтин суви юритилган пойдеворлар, турли безакли мармар ҳайкаллар, экзотик дарахтлар ва тўсиқли лабиринт мавжуд. Фаввораларни эса iPhone орқали бошқариш мумкин. Бино тарихий ёдгорликларга бой бўлса ҳам 2011 йилда қурилган. Айтилишича, ушбу дабдабали бино қурилиши учун 19-асрдаги қадимий кўчмас мулк бузиб ташланган. Саройда иккита бал зали, кинотеатр, иккита бассейн ва шаҳзоданинг санъат коллекциясини намойиш этиш учун мўлжалланган ерости майдони мавжуд.
Шаҳзода Холид ибн Салмон Ал-Сауд
Шаҳода Қирол Салмоннинг тўққизинчи фарзанди ҳамда валиаҳд шаҳзода Муҳаммад ибн Салмон Ал-Сауднинг укаси. Шаҳзода Холид 2022 йилдан бери Саудия Арабистони мудофаа вазири лавозимида ишлайди, уч йил давомида ўринбосар ҳам бўлган. Лавозимга тайинланишидан олдин у кўп вақтини Вашингтонда ўтказган. У 2017 йил апрелда Саудиянинг АҚШдаги элчиси лавозимида ҳам фаолият юритган. У АҚШдаги Жоржтаун университетини битирган.
Нур саройи, Виржиния штати, АҚШ
Daily Mail нашрининг хабарларига кўра, шаҳзода Холиқ талаба бўлиб юрган вақтда ушбу саройни 12 миллион доллар нақд пулга харид қилган. Европа услубида қурилган бинонинг майдони 1900 метр квадрат уй бўлиб, ҳовлиси 5,5 гектардан иборат. Шовқинли АҚШ пойтахтидан ярим соатлик узоқликда жойлашган саройнинг ичкарисига кирсангиз, бинонинг устунлари юнонча услубда эканлигининг гувоҳи бўласиз.
Саройда 8 та ётоқхона, 13 та ҳаммом ва кўплаб бошқа мақсадлардаги хоналар мавжуд. Шаҳзода эгаллаган дабдабали хонадон юқори қаватидан туриб ажойиб боғларни, турли хил манзараларни томоша қилиш мумкин. Сарой бошқа бинолардан ҳашаматлилиги, қулайликлари, кинотеатр, билярд хонаси, баскетбол майдони ҳамда очиқ майдонидаги бассейни билан ҳам ажралиб туради.
Изоҳ (0)