Полиз экинлари, мева ва сабзавотларни бугунги кунда исталган фаслда дўконлардан топиш имкони бўлса-да, мутахассислар тарвузни айнан ёз мавсумида ейишни тавсия қилади. Чунки табиий йўл билан пишиб етилган тарвузда озуқа моддалари тўпланиши вақт, ҳарорат, намлик ва ёруғлик даражаси билан боғлиқ. Ҳозирда эса айни пишиқчилик даври, тарвуз ҳам сероб. Ушбу хуштаъм маҳсулотнинг саломатлик учун бир нечта фойдаларини кўриб чиқамиз.
Танадаги сув мувозанатини сақлайди
Тарвуз 92 фоиз сувдан иборат, шунинг учун у танамизни сувсизланишдан ҳимоя қилади. Организмнинг сувга тўйиниши айниқса ёз фаслида муҳимдир. Шунда танамиз қизиб кетмайди, тери эластиклигини йўқотмайди ва сочлар ҳам жилоли бўлади.
Ортиқча вазнни йўқотишга ёрдам беради
Тарвуз нафақат чанқоқбосди, балки тўйимли экин ҳамдир. У бир марталик тамадди ўрнини босиши мумкин. Тарвуз ўзининг паст калорияси туфайли озиш мақсадида парҳез тутаётганларга фойдалидир.
Қондаги қанд даражасини нормаллаштиради
Тарвуз таркибидаги антиоксидант бирикмалар организмдаги глюкоза алмашинувини тезлаштиради, бу эса қондаги шакар миқдорининг кескин кўтарилишининг олдини олади. Шунинг учун тарвуз ҳатто қанд касаллигига чалинганлар учун ҳам хавфсиздир.
Юрак-қон томир тизимини мустаҳкамлайди
Тарвузда қондаги ёмон холестерин даражасини камайтирадиган ва юрак-қон томир касалликларининг олдини оладиган кўплаб антиоксидантлар мавжуд.
Астма белгиларини енгиллаштиради
800 грамм тарвуз C витаминининг кунлик эҳтиёжини ўз ичига олади. Нафас етишмаслиги билан боғлиқ астма касаллигида бу витамин миқдори камайиб кетади, шунинг учун тарвуз астма аломатларини енгиллаштиришда ёрдам беради.
Саратон ва яллиғланишга қарши
Тарвуз ўзидаги антиоксидантлар ва C витамини туфайли саратоннинг олдини олишга ёрдам беради, яллиғланишни камайтиради, эркин радикалларни йўқ қилади. Шунингдек, тарвуз суяклар, тишларни мустаҳкамлайди, яралар битишини тезлаштиради.
Нерв тизимини фаоллаштиради
500 грамм тарвуз калийга бўлган кунлик эҳтиёжнинг ярмини ўз ичига олади. Ушбу модданинг етишмаслиги оёқ-қўлларнинг увушиши, бош оғриғини келтириб чиқаради. Шунинг учун тарвузни мунтазам истеъмол қилиш турли асаб касалликлари, жумладан, деменцияга чалиниш хавфини камайтиради.
Офтоб уришидан ҳимоя қилади
Истеъмол қилинган бир неча бўлак тарвуз танангизни қизиб кетишдан қутқаради, чунки ушбу экинда тана ҳароратини тартибга солувчи ва мўтадил сақловчи электролитлар мавжуд.
Буйраклар орқали токсинлар чиқиб кетишига ёрдам беради
Тарвуз таркибида сийдик-таносил тизимига ижобий таъсир кўрсатадиган калий ва калсий мавжуд. Бу минераллар буйраклар фаолиятини яхшилашга ёрдам беради, организмдан зарарли моддалар ва токсинларни чиқариб ташлашга кўмаклашади.
Кўриш қобилиятини тиклайди
Тарвуз таркибидаги А витамини кўзлар саломатлигини мустаҳкамлайди ва узоқ йиллар давомида ўткир кўриш қобилиятини сақлаб қолишга ёрдам беради.
Тери ва сочлар учун фойдали
Тарвуздаги А ва C витаминлари танамизда коллаген ишлаб чиқарилишига ёрдам беради. У тери намлиги, эластиклиги учун жавобгардир. Тарвуз, шунингдек, сочларнинг силлиқ ва жилоли бўлишига ҳисса қўшади.
Ичаклар фаолиятини яхшилайди
Тарвуз таркибида ичак микрофлорасига ижобий таъсир кўрсатадиган ўсимлик толалари мавжуд. Улар қабзият ва овқат ҳазм қилиш тизимидаги айрим муаммоларда фойдалидир.
Изоҳ (0)