Ўзбекистон олийгоҳларида тўлов-контракт нархлари йўналишлар ва шарт-шароитларга қараб турлича белгиланади. Энг паст қийматдаги шартнома миқдори 6,4 миллион сўм бўлса, айрим хусусий университетларда йиллик шартнома суммаси 100 миллион сўмгача етади.
Ҳозирги кунда республикада 111 та давлат, 67 та хусусий олий таълим муассасалари (ОТМ) фаолият юритмоқда. “Дарё” давлат ва нодавлат университетларнинг бакалавриат йўналиши бўйича (кундузги таълим) тўлов-контракт нархлари йилига қанчалиги билан қизиқди.
Давлат ОТМларидаги нархлар
Давлатга қарашли ОТМларида тўлов-контракт нархлари охирги марта 2019/2020-ўқув йилида 18 фоизга оширилган. 2019 йил 1 сентябрдан стипендияли ва стипендиясиз тўлов-шартнома тизими жорий этилган. Олий таълим, фан ва инновациялар вазирлиги 2023/2024-ўқув йили учун бакалавриат таълим йўналишлари бўйича шартнома тўловлари миқдорини (ўзгармаган) эълон қилган.
Ўтган ўқув йилида давлат ОТМларининг педагогика, аниқ ва табиий фанлар йўналишларида таҳсил олиш йилига 6,4 миллион сўмни ташкил этган.
Санъат йўналишида ўқиш 7,8 миллион сўм, иқтисод 9,1 миллион сўм, жаҳон иқтисодиёти ва халқаро иқтисодий муносабатлар ҳамда ҳуқуқ йўналишларидаги таълим йилига 9,8 миллион сўм бўлган.
Компьютер технологиялари ва информатика, алоқа ва ахборотлаштириш, телекоммуникация технологиялари, архитектура ва қурилиш йўналишларида таҳсил олиш 7 миллион сўм этиб белгиланган. Соғлиқни сақлаш бўйича ўқиш йилига 9,1 миллион сўмни ташкил этган.
Хусусий университетлардаги нархлар
Ўзбекистондаги хусусий университетларда тўлов-контракт нархлари давлат ОТМларидагига қараганда анча юқорилигини кўриш мумкин. Масалан, Central Asian university (собиқ Akfa университети) расмий сайтида йўналишлар кесимида ҳар бир семестер учун шартнома нархлари кўрсатилган. Университетда энг юқори тўлов-контракт нархи тиббиёт йўналишида бўлиб, бир семестер учун тўлов қиймати 50 миллион сўмни (йилига 100 миллион сўм) ташкил этади.
Туризм ва меҳмонхона бошқаруви, халқаро бизнес, логистика йўналишларида тўлов-контракт суммаси 37,5 миллион сўм (1 семестер учун). Бухгалтерия, молия, иқтисодиёт, маркетинг, менежмент, жамоатчилик билан алоқалар ва ОАВни бошқариш факультетларида таҳсил олиш нархи 25 миллион сўмдан.
Муҳандислик 21,9 миллион сўм, инглиз тилини ўқитиш ва таълимни бошқариш факультетида ўқиш 18,8 миллион сўм.
TEAM тадбиркорлик ва бизнес университетида ўқиш учун шартнома тўлови йилига 38,3 миллион сўм ҳисобланади. Университетда туризм ва меҳмонхона бошқаруви, халқаро бизнес, рақамли инновациялар, маркетинг йўналишлари бор. Барча йўналишларга тўлов нархи бир хил кўрсатилган.
Cambridge international university сайтида бешта йўналишдаги тўлов-контракт нархлари кўрсатилган. Қайд этилишича, университетнинг ахборот технологиялари, бизнес менежмент, бухгалтерия ҳисоби ва молия йўналишларида бир йил ўқиш 25 миллион сўм. Инглиз тилини ўқитиш ва бизнес бошқаруви йўналишларида эса бу рақам 18 миллион сўм.
Profi university’даги банк иши ва аудит, бухгалтерия ҳисоби ва аудит, иқтисодиёт, туризм йўналишларида бир йил ўқиш (кундузги таълим) нархи 16,9 миллион сўмни ташкил этади. Педагогига соҳасидаги ўзбек, инглиз, рус тиллари ва адабиётлари, маркетинг йўналишларининг тўлов-контракт миқдори 16,2 миллион сўмлиги ёзилган. Ахборот тизимлари ва технологиялари йўналишида йиллик таҳсил олиш 18,1 миллион сўм.
Янги аср университетида ўқиш нархлари ҳам олийгоҳ расмий сайтига жойланган. Университетнинг иқтисодиёт, бухгалтерия ҳисоби, филология ва тилларни ўқитиш йўналишларида бир йиллик кундузги таълим олиш 19 миллион сўмни ташкил этади. Психология, педагогика йўналишларида ўқиш эса 18 миллион сўм, дизайн йўналишида таҳсил 20 миллион сўм.
EMU university ҳам йиллик тўлов-контракт нархларини эълон қилган. Университетда стомотология, даволаш иши йўналишларида бир йил ўқиш миқдори 54,9 миллион сўм, педиатрия, фармация йўналишлари 36,7 миллион сўм, биология 11,9 миллион сўм, кимё 12,9 миллион сўм.
ТМC institute’нинг ҳам тўлов–контракт нархлари йўналишларга қараб ўзгаради. Масалан, институтда ахборот тизимлари ва технологиялари йўналишида бир йил ўқиш нархи 30 миллион сўмни ташкил этади. Қолган иқтисодиёт, бухгалтерия, банк иши ва аудит, логистика, молия ва молиявий технологиялари, педагогика йўналишларида тўлов-контракт миқдори йилига 18 миллион сўм этиб белгиланган.
Изоҳ (0)