“Ҳукумат мамлакатда бир нечта АЭСлар қуриш имкониятини кўриб чиқмоқда” — Қозоғистон энергетика вазири

Қозоғистон ҳукумати мамлакат ҳудудида бир нечта атом электр станцияларини қуриш имкониятларини кўриб чиқмоқда. Бу ҳақда Қозоғистон энергетика вазири Алмасадам Саткалиев берган маълумотга асосланиб, AKI Press манбаси хабар берди.

Қозоғистонда бир нечта АЭСлар қуриш масаласи 16 июль куни ОАВ вакиллари учун бўлиб ўтган брифингда маълум қилинган. Учрашувда Энергетика вазирлиги расмийлари қатнашиб, ядро дастури борасидаги кун таркибини қисман очиқлаган.

“Энергетика вазирлиги референдум (Қозоғистонда атом электр станцияси қуриш бўйича) ҳақида гапирар экан, Қозоғистонда фақат битта атом электр станцияси қуришни таклиф қилмаяпти: гап атом энергетикасини ривожлантириш ҳақида кетмоқда. Атом энергетикаси — бу атом саноатининг бир қисмидир”, деган мамлакат вазири брифингда.

Саткалиев келгусида ишончли ва кенгайтириладиган энергия таъминотини таъминлаш учун мамлакатда янги атом электр станцияларини қуриш долзарб эканлигини билдирган. Бу лойиҳаларни амалга ошириш учун учта йирик қурилиш майдони тайёрланаётгани хабар қилинган.

“Йирик ва кичик қувватли станциялар нуқтайи назаридан Балхаш полигонини алоҳида таъкидлаш жоиз. Бундан ташқари, Курчатов полигони, шунингдек, илгари Қозоғистоннинг ғарбий қисмида ўрта қувватли завод жойлашган ҳудуд бор. Бу уч иншоот келгусидаги ядровий лойиҳаларда фойдаланилади” дея маълумот берган Қозоғистон расмийси.

Ўтган йили Қозоғистон Энергетика вазирлиги атом электр станцияси қурилиши бўйича келишувга эришилса, Олмаота вилоятининг Жамбил туманидаги Улкен қишлоғида платформани қуриш бошланиши мумкинлигини айтган эди.

“Глобал миқёсда кўмирдан фойдаланиш бўйича жиддий чекловларга дуч келинмоқда. Бундай ҳолда газ биринчи навбатдаги ёқилғи сифатида ишлатилади. Шунинг учун ҳозирча бизда муқобил вариантлар кам”, деган Саткалиев.

Қозоғистонга бир неча мамлакатлардан ядровий ҳамкорлик бўйича таклифлар тушган. Хусусан, HPR-1000 реакторига эга Хитойнинг CNNC компанияси, APR-1400 реакторига эга Жанубий Кореянинг КHNP компанияси, VVER-1200 ва VVER-1000 реакторларига эга Россиянинг Росатом ва EPR-1200 реакторига эга Франциянинг EDF компаниялари Астанага таклиф юбориб, шериклик таклиф қилган.

Шунингдек, Қозоғистон ҳукумати NuScale (АҚШ), GЕ-Hitachi (АҚШ—Япония) каби технология “гигантлари” ва етказиб берувчиларининг мурожаатларини ўрганиб чиқаётгани билдирилган.

Манбага кўра, ҳозирги пайтда Қозоғистон учун лойиҳадаги битта АЭСни қуриш харажатлари ўртача 10-12 миллиард долларга баҳоланмоқда.