Сомалидаги терактда 5 киши ҳалок бўлди, 20 киши жароҳатланди

Сомали пойтахтида 14 июль куни юз берган теракт оқибатида 5 киши ҳалок бўлди. Бу ҳақда Reuters нашри хабар берди.

Манбада айтилишича, якшанба куни Сомали пойтахти Могадишу шаҳридаги ресторанлардан бирининг олдида ичига бомба ўрнатилган машина портлатилган. Ҳодиса оқибатида яқин-атрофдаги тинч аҳоли вакиллари ва бир қанча давлат муассасаларига жиддий шикаст етган.

Полиция ҳодиса оқибатида 5 киши ҳалок бўлгани ва 20 киши жароҳатланганини расман тасдиқлаган. Расмийлар терактда диний радикал гуруҳларни айблаган.

Портлатилган машинанинг асосий манзили Могадишудаги президент саройи бўлган. Аммо транспорт манзилига етиб бормасдан номаълум сабабга кўра йўлда портлаб кетган.

Теракт уюштирилган машина 10 га яқин автомобилни яроқсиз ҳолга келтирган. Портлаш президент саройига яқин кучли қўриқланадиган ҳудудда рўй берган.

Портлаш учун жавобгарликни Сомалидаги “Ал-Шабаб” жангарилари ўз зиммасига олган. Бу гуруҳ мамлакатнинг жанубий қисмларида ўрнашиб, экстремистик ва радикал ғоялар таъсирида террористик ҳужумлар ташкил этиб келган.

Могадишу ҳокимияти портлаш юз берган ҳудудни қўриқлашга жавобгар бўлган полиция штабини масъулиятсизликда айблаган. Чунки полиция ходимлари ҳалокат юз берган пайтда Евро—2024 футбол мусобақасини томоша қилаётган бўлган.