Disney компанияси “Қаттиққўл хоним” фильмининг давомини суратга олиши мумкин. Бу ҳақда Deadline нашрига таяниб “Правила жизни” хабар берди.
Фильмда қатъий ва талабчан раҳбар, бош муҳаррир Миранда Пристли ролини ўйнаган актриса Мерил Стрип ва мода журнали ходими образини гавдалантирган Эмили Блант ўз ролларига қайтиши мумкин. Ҳали актрисалар суратга олиш шартномасини имзоламаган.
Фильмнинг давоми бўйича музокаралар унинг режиссёри Дэвид Фрэнкель томонидан олиб борилмоқда, сценарий муаллифи Алин Брош Маккенна. Мазкур хабарларга Disney ҳозирча изоҳ бермаган.
Тахминларга кўра, фильмнинг кейинги қисмида Podium журнали муваффақиятсиз кунларни бошидан кечириши ҳақида ҳикоя қилинади. Унинг бош муҳаррири Миранда Пристли йирик люкс бренд билан реклама шартномасини имзолашни режалаштиради. Бунинг учун у ўзининг собиқ ёрдамчиси, ҳозирда ўша брендда етакчи лавозимни эгаллаб турган Эмилидан ёрдам сўрайди.
Актриса Энн Ҳэтуэй ўз ролига қайтиш масаласи ҳозирча очиқ қолмоқда, бироқ жорий йилнинг бошида у “Қаттиққўл хоним” фильмининг давоми суратга олиниши даргумон, деган фикрни билдирганди.
Лорен Вайсбергернинг “Prada кийган иблис” номли китоби асосида режиссёр Дэвид Фрэнкель томонидан суратга олинган “Қаттиққўл хоним” фильми 2006 йилда экран юзини кўрган. Лойиҳа Мерил Стрипга комедия жанридаги энг яхши актриса роли учун “Олтин глобус” мукофотини ва бош рол учун “Энг яхши актриса” номинацияда “Оскар” мукофотини олиб келган.
Аввалроқ фильм асосида мюзикл қўйилиши ҳам маълум бўлган эди. Унда Миранда Пристли ролини Ванесса Уильямс ижро этади.
Изоҳ (0)