Перу тоғларида бундан 22 йил муқаддам изсиз йўқолган америкалик алпинистнинг жасади аниқланди. Бу ҳақда CNN нашри хабар берди.
Алпинист Билл Стампфл бундан анча йиллар муқаддам Перунинг Анд тоғлари бўйлаб саёҳат қилган. Саёҳати давомида у қўққисдан юз берган қор кўчкиси оқибатида улкан дарада кўмилиб қолган.
Собиқ алпинистнинг жасади 27 июнь куни ака-ука Райан Купер ва Уэсли Уоренлар томонидан топилган. Саёҳатчилар Ҳуаскаран тоғига сафар пайтида номаълум жасадга дуч келишган.
Алпинистнинг жасади топилганини унинг ўгли Жозеф Стампфл ҳам тасдиқлаган. Ҳозирда жасад яқин атрофдаги шаҳарлардан бирида экани билдирилган.
Ака-ука саёҳатчилар жасадни Перунинг Кордилера-Бланка тизмасидаги ясси ҳудудда, денгиз сатҳидан 5 километр баландликда топишганини билдиришган. Текис юзага нисбатан бўртиб чиққан номаълум жисм саёҳатчиларнинг эътиборини тортган. Текшириб кўрилганда у инсон танаси қолдиқлари эканлиги маълум бўлган.
Тоғли ҳудуддаги муз қатлами туфайли жасад яхши сақланган. Билл Стампфлнинг ёнидан унинг никоҳ узуги, шахсий гувоҳномаси, камера, паспорт, ҳамён ва кўзойнак ҳам топилган.
Маълумотларга кўра, Билл Стампфл ва унинг икки ҳамкасби Стив Эрскине ва Метю Ричардсон 2002 йилнинг 24 июнь куни Ҳуаскаран тоғида қор кўчкиси пайтида бедарак кетган. Ўша пайтда алпинист 58 ёшда бўлган. Тоғли ҳудудда ҳафталар давомида ўтказилган қидирув алпинистларни топишга ёрдам бермаган.
Алпинист Стампфлнинг жасади топилгач, у отопсия қилинган ва Перудаги Хуарес шаҳрига олиб келинган. Эндиликда жасад пойтахт Лимага олиб кетилиб, куйдирилиши хабар берилган. Марҳумнинг хоки эса АҚШга юборилади.
Изоҳ (0)