Бағдоднинг Ал-Карх тумани жиноий суди “Исломий давлат” террорчилик гуруҳи асосчиси ва биринчи “халифаси” Абу Бакр ал-Бағдодийнинг беваси, Умму Ҳудайфа номи билан машҳур Исро Ражаб Саҳр ал-Қаисийни ўлим жазосига ҳукм қилди.
Шафақ Неwс хабарига кўра, аёл террорчи гуруҳ билан ҳамкорликда ва Синжар вилоятида қўлга олинган қулликдаги язидий аёлларни мажбуран ҳибсга олганликда айбдор деб топилган. Маълум бўлишича марҳум ал-Бағдодийнинг бир неча хотини бўлган.
2019 йилда АҚШнинг ўша вақтдаги президенти Дональд Трамп буйруғига кўра, АҚШ қўшинлари Сурия шимоли-ғарбидаги ал-Бағдодий оила аъзолари билан яширинган ҳудудга рейд ўтказган. Туннел ичига қочган Бағдодий ўзини ва икки фарзандини портлатиб юборган. Отишма пайтида унинг тўрт хотинидан иккитаси ҳалок бўлган.
Умму Ҳудайфа у ерда бўлмаган — ўша пайтда у аллақачон сохта исм билан Туркияда яшаган ва у ерда 2018 йилда ҳибсга олинган. У жорий йилнинг февраль ойида Ироққа қайтариб юборилган ва расмийлар унинг ИШИД фаолиятидаги ролини текшираётган пайтдан бери қамоқда сақланган.
“Исломий давлат” жиноятларида аёлларнинг иштироки масаласи баҳсли. Ҳаракат мафкураси туфайли улар жамият ҳаётидан четлаштирилган. Бироқ уларнинг кўплари қўлга олинган қулларни суиистеъмол қилгани, шунингдек, ахлоқ полициясининг фаолиятида иштирок этгани маълум, дейилади хабарда.
Изоҳ (0)