Фильм ва сериаллар суратга олинганидан кейин томошабинлар орасида машҳур бўлиб кетган уйлар (фото)

Биз севиб томоша қиладиган фильмлардаги бош қаҳрамонлар яшайдиган уйлар декорация эмас, балки ҳақиқий хонадонлардир. Уларнинг аксарияти ҳозирда диққатга сазовор жой ёки музейга айлантирилган ва бутун дунёдан кўплаб сайёҳлар ташриф буюрадиган севимли маскан ҳисобланади. Айримлари эса ижарага берилади ва уларда яшаш учун сезиларли даражада юқори нарх белгиланади.  

Ноянинг уйи, “Хотира кундалиги”

Голливуднинг энг қайғули мелодрамаларидан бири бўлган “Хотира кундалиги” асари суратга олинган уй АҚШнинг Жанубий Каролина штатидаги Вадмало оролида жойлашган.

Бугунги кунда уй музей сифатида ташриф буюрувчилар учун очиқ. Унинг қиймати тахминан 1,3 миллион долларни ташкил этади.

Маккаллистерлар уйи, “Уйда ёлғиз”

Кевин (Маколей Калкин)ни кўча ўғриларидан моҳирлик билан ҳимоя қилган Маккалистерлар уйи Чикагода жойлашган бўлиб, 1920 йилларда қурилган. 400 квадрат метрлик бино диққатга сазовор жойлардан бири ҳисобланади.

Ҳозирда мазкур уйда хонадонни бир ярим миллион долларга харид қилган оила истиқомат қилади. Кевиннинг уйи Иллинойс штатидаги энг кўп ташриф буюриладиган сайёҳлик жойларидан бири ҳисобланади.

Белланинг уйи, “Сумерки”

Вампирлар ҳақидаги фильмда Белла Свон (Кристен Стюарт) отаси билан бирга яшаган кичкина уй АҚШнинг Орегон штатидаги Сент Ҳеленс шаҳрида жойлашган.

У 1930 йилларда қурилган. Уйда бешта ётоқхона, ошхона ва каминли меҳмонхона мавжуд.

Дурслей уйи, “Гарри Поттер” франшизаси

Ушбу франшиза ихлосмандлари Гаррининг биринчи яшаган уйи манзилини ёддан билади: Surrey, Little Whinging, 4 Privet Drive. Аслида уй Беркширда, Англиянинг жануби-шарқида жойлашган.

Уй жуда оддий ва камтарона қурилган: хонадонда учта ётоқхона, меҳмонхона, ошхона ва битта ҳаммом мавжуд. Уйнинг асл эгалари бир кун келиб бутун дунёдан келган сайёҳлар ушбу уйни кўришни исташини хаёлига ҳам келтирмаган. 2010 йилда уйнинг янги эгалари уни 660 минг долларга сотиб олди ва таъмирлади. Аммо Гарри яшаган зинапоя остидаги кичик хона ўзгаришсиз қолдирилди.

Опа-сингил Ҳолливеллар уйи, “Сеҳрланганлар”

Сеҳргар опа-сингиллар яшаган “Сеҳрланганлар” телесериалидаги тўқ қизил рангли муҳташам сарой Лос-Анжелесда жойлашган. Уй 1887 йилда қурилган. Сериални суратга олиш учун уйнинг фақат фасад қисми ишлатилган. Сериалдаги хоналарнинг бари махсус павильонда суратга олинган.

Жей Гэтсби қасри, “Буюк Гэтсби”

Жей Гэтсби (Леонардо Ди Каприо) нинг ҳашаматли саройи павильон эмас, балки ҳақиқий бинодир: фильмни суратга олиш учун декорациялар ва махсус эффект рассомлари Сиднейдаги Авлиё Патрик биносига турли ўзгартиришлар киритди. Уйга бир нечта миноралар қўшилди, бутун фасадга безак берилди, ҳовли эса фаввора билан жиҳозланди.

Гецби кошонасининг ички қисмини тубдан ўзгартиришга роппа-роса икки ҳафта вақт кетди.

Фил Коллинзнинг уйи, “Суғур куни”

Фил Коллинз (Билл Мюррей) ҳар куни эрталаб уйғонганда бир хил кун қайта-қайта бошланадиган уй АҚШнинг Иллинойс штатидаги Вудсток шаҳрида жойлашган. Бугунги кунда уй ижарага бериладиган кичик меҳмонхонадир.

Хонадон 1895 йилда қурилган бўлса ҳам, унинг асл кўриниши ҳамон сақланиб қолган.