Uzbekistan Airways бош офисида авиакомпания парвоз мактабининг биринчи битирувчи-учувчиларига сертификатлар топширилишига бағишланган тадбир бўлиб ўтди. Авиакомпания тарихида биринчи марта учувчиларни тайёрлаш “Ўқув-машғулот маркази” МЧЖ базасида ўтказилди.
Uzbekistan Airways авиакомпанияси бошқаруви раиси Шухрат Худайкулов Ўзбекистон ҳукумати томонидан мамлакатимизда фуқаро авиациясини ривожлантиришга қаратилаётган эътибор, айниқса, соҳа учун кадрлар тайёрлашда ҳар бир қадам оқилона ва мақсадли қўйилиши кераклигини таъкидлади.
Устозлар ва бошқарув ходимлари авиакомпания учун бундай муҳим воқеа ва Ўзбекистонда учувчиларни тайёрлаш Ўқув-машғулот маркази негизида қандай ўтаётгани ҳақида фикр билдирдилар. Uzbekistan Airways, кўплаб халқаро авиакомпаниялар сингари, учувчилар жамоасини ёш ва шижоатли кадрлар билан тўлдиришга интилмоқда. Учувчиларни тайёрлаш – бу узоқ вақт ва машаққатли меҳнатни талаб қиладиган бутун бир тизимли иш.
Вазирлар Маҳкамасининг 2017 йил 19 июлдаги “Фуқаро авиацияси учувчиларини тайёрлашни ташкил этиш чора-тадбирлари тўғрисида”ги қарори билан авиакомпания “Ўқув-машғулот маркази” МЧЖ негизида учувчи-мутахассисларни тайёрлашни бошлади. Танлов ўтказилгандан сўнг гуруҳга беш нафар тингловчи қабул қилинди. COVID-19 пандемияси туфайли 2020 йилда дарслар жараёни вақтинча тўхтатилди, икки йилдан сўнг машғулотлар қайта тикланди. Ўқув жараёнида юқори малакали мутахассис-авиаторлар, бошқарув ходимлар таркиби иштирок этди. Парвоз амалиёти Cessna-172 ҳаво кемасида амалга оширилди.
Ушбу дастур Фуқаро авиацияси халқаро ташкилоти (ICAO), Халқаро ҳаво транспорти ассоциацияси (IATA) ва Ўзбекистон Республикаси авиация қоидалари талабларига жавоб беради. Uzbekistan Airways АЖ бошқаруви раиси Шухрат Худайкулов учувчилар мактабининг биринчи тингловчиларини дипломлар билан тақдирлаб, бутун дунё бўйлаб фуқаро авиацияси мутахассисларига талаб ортиб бораётганини қайд этди, шунингдек, устоз ва мураббийларга алоҳида миннатдорчилик билдирди. “Биз авиатор-ходимларимиз халқаро авиакомпаниялар билан бир қаторда энг яхши шароитларда ишлашларини таъминлаш учун барча шароитларни яратиб беришга тайёрмиз”, деди у.
Хумоюн Маҳмудхонов, Фарҳод Одилов, Аброр Нуриддин ва Азизбек Шарипов Boeing 767 ҳаво кемасининг учувчиси сертификатини олишди. Ҳозирги вақтда Ўқув-машғулот марказида бўлажак учувчиларни тайёрлаш давом этмоқда.
Шуни таъкидлаш керакки, авиакомпания мамлакатимизнинг иккита етакчи университети билан кадрлар тайёрлаш соҳасида ҳамкорлик қилиш бўйича шартномалар имзолади. Тошкент давлат транспорт университети авиакомпания билан биргаликда “Ҳаво кемаларининг парвоз эксплуатацияси” йўналиши бўйича талабаларни тайёрлайди. Тошкент шаҳридаги Турин политехника университети “Аэрокосмик муҳандислик” йўналиши учун жавобгар бўлади.
Ўқув жараёнлари 2+2 форматида учувчиларни тайёрлашни кўзда тутади: икки йил ўқиш университетда ва яна икки йил авиакомпаниянинг Ўқув-машғулот маркази қошидаги учувчилар мактабида бўлиб ўтади. Томонлар авиакомпания учун кадрлар захирасини шакллантириш, жумладан, талабаларнинг амалий машғулотлари ва амалиётини ташкил этишга қаратилган керакли чора-тадбирларни амалга оширишни режалаштирмоқда. ТDTУ ва ТПУ таълим муассасаларининг энг яхши битирувчиларини ишга қабул қилиш механизми ишлаб чиқилади. Шу билан бирга, улар касбий тайёргарлик ва соғлиғи бўйича авиакомпаниянинг стандарт талабларига жавоб бериши керак.
Келишув 2024/2025-ўқув йилидан кучга киради.
Реклама ҳуқуқи асосида.
Изоҳ (0)