Ўзбекистон инвестициялар, саноат ва савдо вазири Лазиз Қудратов ва Япония элчиси Хатори Такаши беғараз ёрдам доирасида амалга оширилаётган 3 миллиард иеналик (6,3 миллион доллар) “Иқтисодий ва ижтимоий ривожланиш дастури” бўйича алмашинув ноталарини имзолади. Бу ҳақда вазирлик матбуот хизмати хабар берди.
Ҳужжатларга асосан Ўзбекистонга компьютер томографияси сканерлари ва рентген аппаратлари билан жиҳозланган қўшимча 4 та тиббий мобил контейнер етказилади. Бу билан республика бўйлаб самарали тиббий ёрдам кўрсатиш имкониятлари янада яхшиланади.
Томонлар ҳамкорликни ривожлантириш, жумладан, Ўзбекистонда юқори сифатли тиббий хизматлардан фойдаланиш имкониятларини янада кенгайтиришга содиқликларини билдирдилар, — дейилади хабарда.
Компьютер томографияси сканерлари қатор касалликларни аниқлашда жуда муҳим ҳисобланади. Мобил тиббий контейнер ҳар қандай жойда, шу жумладан, фавқулодда вазиятларда ҳам хизмат кўрсатиши мумкин.
Аввалроқ Япония Хитой, Ҳиндистон, БАА ва Ўзбекистон компанияларига Россияга қарши санкцияларни четлаб ўтгани учун санкциялар жорий қилиши тўғрисида хабар берилганди. Шунингдек, Япония компаниялари Ўзбекистонда табиий офатларнинг олдини олиш маҳсулотларини ишлаб чиқариши мумкинлиги айтилган эди.
Изоҳ (0)