Футбол бўйича Ўзбекистон Суперлигасининг 13-турида “Сурхон” жамоаси “Олимпик”ка қарши баҳс олиб борди ва 0:2 ҳисобида имкониятни бой берди.
Учрашувнинг 72-дақиқасида “Сухрон” ҳимоячиси Нодирхон Неъматхонов қизил карточка олиб, майдонни тарк этди. Футболчи майдонни тарк этаётган маҳалда ҳиссиётларга берилиб, бўш сув идишини тепиб юборди ва бу идиш учрашув болбойи ёнидан ўтиб кетди.
Нодирхон Неъматхонов ушбу иши учун боладан ва унинг отасидан узр сўраб, Муҳаммад исмли болбойга совғалар ва оригинал либосни тақдим этди.
Шунингдек, “Сурхон” клуби ҳам вазият юзасидан бола ва унинг ота-онасидан узр сўраган:
“Футбол — бу нафақат ғалабадан келадиган хурсандчилик, чиройли голлар, балки ҳиссиётлар ҳамдир. Афсуски, бу вазиятда жамоамиз футболчиси ўзини нотўғри тутди. “Сурхон” бу ҳаракатни ҳеч қандай ҳолатда оқламайди. Бизнинг клубимиз фейр-плей қоидаларига мувофиқ ҳалол футболнинг тарафдоридир.
Футболчимиз ҳаракати учун болбой ва унинг ота-онасидан расмий узр сўраймиз”, — дейилади клуб матбуот хизмати хабарида.
Ўзбекистон Профессионал Футбол лигаси ҳам вазиятга ўз эътиборини қаратди. ПФЛ директори Диёр Имомхўжаев болбой бола билан кўришди.
“Лига “Сурхон” клуби аъзосининг ҳатти-ҳаракатларига нисбатан тегишли чора кўради ва шу ўринда майдон атрофида меҳнат қилаётган барча болбой йигитларга меҳнатлари учун миннатдорчилик билдиради. Ишонамизки, уларнинг ҳар бири келажакда катта даражадаги футболчи бўлиб етишади”, — деб ёзади ПФЛ.
Изоҳ (0)