Пиёдалар йўлакчаларининг барчаси дабдала, ҳаммаси эгаллаб олинган. Бу ҳақда 25 июнь куни Сенатда бўлиб ўтган йўлларда инсон хавфсизлигини таъминлашга қаратилган анжуманда сенатор Рустам Калонов айтиб ўтди.
Маҳалладаги асосий кўчалардаги (бу қор ва ёмғирларда яна ҳам сезилди) бизни янги бойваччалар, тадбиркорлар, ҳуқуқни поймол қиладиганлар наинки, кўчанинг 1-2 метр қисмини, балки пиёдалар йўлакларини ва гуллар экиладиган жойларни эгаллаб олишган.
Уларга чора кўриш керак, қабул қилинаётган қарорларга киритинглар. Ҳамма томон фалончини жияни, фалончини ўғли, фалончиёв, пистончивой бўлиб кетди, — деди сенатор.
Рустам Калоновнинг алоҳида таъкидлашича, жойларда қурилаётган йўлларда пиёдалар учун йўлаклар йўқ.
Уят эмасми пиёдалар йўлакларидан ном нишон йўқ. Йўл шундай бўлиши керакми? Шуларга эътибор беринглар. Стандарт бўйича йўл қандай бўлишини кўрсатинглар.
Асфалтнинг сифати дабдала, уч йилга етмайди. Йўллар қуриш учун ҳаммаёқни ковлаб ташлашмоқда, сал келишиб ишланглар.
Буларга чора кўрилиши керак. Жойларда фуқаролар билан учрашганимизда фақат шу масалалар кўтарилмоқда. Ёшлар билан гаплашсангиз пиёдалар йўлакчаси нималигини билмайди, — деди у.
Маълумот учун, йўл-транспорт ҳодисаларнинг 57 фоизи йўл инфратузилмасидаги камчиликлар оқибатида содир этилган.
Изоҳ (0)