Украина президенти Владимир Зеленский мамлакат бирлашган қуролли кучлари қўмондонини лавозимидан олди. Бу ҳақда RFE/RL’C манбаси президент идораси тарқатган хабарга асосланиб, маълумот берди.
Зеленский Украина бирлашган кучлари қўмондони Юрий Содол ўрнига бригада генерали Андрей Хнатов тайинланишини эълон қилган. 24 июнь куни эълон қилинган мурожаатда Киев ҳукумати раҳбари қўмондоннинг вазифасидан олиниши сабабларини тушунтирмаган.
Манбада айтилишича, олдинроқ Украина депутати Маряна Безухла Содолнинг Одессадаги чиқишлар ва қарорларини танқид остига олган. Бундан ташқари, Миллий гвардиянинг “Азов” бригадаси штаб бошлиғи Богдан Кротевич давлат тергов бюросига Содолни тергов қилиш талаби билан ариза топширган.
Украинанинг бир қатор расмийлари қўмондон Юрий Содолни жиддий ҳарбий муваффақиятсизликлар ва шахсий таркибда катта талафотларга рўбаро қилишда айблаган. “Азов” бригадаси штаб бошлиғи Богдан Кротевич генерални ҳаттоки “ҳар қандай рус генералига солиштирганда кўпроқ украиналик аскарларни ўлдирганликда” айблаган.
Ҳарбийларнинг бир гуруҳи янги қўмондон Андрей Хнатовнинг вазифага тайинланишини ижобий қабул қилган. Унинг ҳарбий раҳбариятга келиши фронтга хушхабарлар келтиришига ишонилган.
“Хнатов жуда яхши офицер бўлган. Умид қиламанки, унинг келиши ортидан фронтдаги янгиликлар ижобий тус олади”, — деган Богдан Кротевич.
Бўшатилган генерал Юрий Содол ўтган йилнинг февралида собиқ қўмондон Валерий Залужний ва Зеленский ўртасида муносабатлар ёмонлашуви ортидан тайинланган эди. Унинг бошқаруви пайтида мамлакат шарқий мудофаа чизиғи бўйлаб катта ҳудудларни Россияга бой берган.
Содол Украинанинг шарқий ва жанубий қуруқликдаги кучларини бошқарган. Сўнгги ойларда кучайиб бораётган Россия ҳужуми билан тўқнашган.
Киевдаги бир гуруҳ депутатлар Юрий Содолни муваффақиятсизликларда айблашга қарши чиққан. Украина шарқда устунликни йўқотиши қўмондоннинг фаолиятига эмас, балки Ғарб ёрдами кечикиши ва Россияда ҳарбий ишлаб чиқаришнинг кўпайишига боғлиқ экани айтилган.
Изоҳ (0)