Ёз келди, демак, барчамиз қуёшдан сақлайдиган кўзойнакларни тақишни бошладик. Чунки улар нафақат кўзни ультрабинафша нурлардан ҳимоя қилади, балки урфдаги аксессуар ҳамдир. Бугунги мақолада қуёшдан ҳимоя қилувчи кўзойнакларнинг хусусиятлари ва уларни тўғри танлашни ўрганамиз.
Барча кўзойнакларга хил технология ёрдамида яратилган линзалар қўйилмайди. Шунинг учун уларнинг нархида катта фарқ бўлади. Кўзойнак ёрлиғида “UV 400” ёки “UVA ва UVB дан 100% ҳимоя” кабилар кўрсатилса, демак улар ультрабинафша нурлардан тўлиқ ҳимоя қилади. Ультрабинафша нурлардан максимал сақлайдиган кўзойнаклар қуйидаги хавфли касалликлардан сақлайди:
- Кўз шох пардасининг куйиши;
- Катаракта;
- Кўзда сариқ доғларнинг пайдо бўлиши;
- Кўз тўр пардасининг шикастланиши.
Айниқса катаракта касаллиги қуёш таъсири остида доимий қолишдан вужудга келади.
Кўзойнакларнинг қуёш нурларидан ҳимоя қилиш даражаларини аниқлашнинг яна бир усули мавжуд. UV нурларидан юқори сифатли ҳимоя қилувчи кўзойнаклар поларизация қопламасига эга. У ёруғликни филтрлайди, қуёшда акс этувчи ёрқин нурлар ҳажмини камайтиради. Шунингдек, сув юзасидаги ёрқинлик ёки яқинлашиб келаётган машинадан тушадиган қуёш нурини тўсади. Бундай кўзойнаклар одатийсига қараганда қимматроқ бўлади.
Қуёшдан ҳимоя қилувчи кўзойнак танлашда кўз ва унинг атрофини тўлиқ ёпадиган, кенг ҳажмдаги аксессуарга урғу бериш тавсия этилади. Чунки бугунги кунда урф бўлган тор ва кичик кўринишдаги кўзойнаклар қуёшдан яхши сақламайди.
Яна бир муҳим омил — бу аксессуарнинг қандай материалдан тайёрлангани. Поликарбонат, шиша, титан ёки зангламайдиган пўлат каби бардошли материаллардан тайёрланган кўзойнак сизга узоқ вақт хизмат қилади.
Тўқ рангли кўзойнак бошқа рангдаги ойнали кўзойнакларга қараганда қуёшдан кўпроқ ҳимоялайди, деган тушунча хатодир. Оч ва сарғиш рангли ойна контрастни оширади ва ёрқинликни пасайтиради. Тўқ рангли кўзойнакни таққанда кўз қорачиқлари кенгаяди ва бу зарарли ҳисобланади.
Изоҳ (0)